Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 442 Hüküm no: 372 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin evini istiğlal yoluyla, vefat eden Mustafa Efendi’nin çocuklarının vasisi Hasan Çavuş’a sattığı Mahmiye-i İstanbul’da Koğa[cı] Dede mahâllesinde sâkin sâbıkā Hemedan kādısı olan umdetü’l-ulemâi’l-izâm zübdetü’l-fudalâi’l-fihâm Alizâde fazîletlü Mustafa Efendi necli’l-mevlâ el-merhûm Mehmed Efendi meclis-i şer‘-i şerîf-i enverde mahmiye-i mezbûre[de] Haraççı Muhyiddin mahâllesi ahâlîsinden olup vilâyet-i Rumeli’nde medîne-i Yenişehir-i Fener kādısı iken bundan akdem medîne-i mezbûrda vedâ‘-ı âlem-i fânî eden merhûm Başmakçızâde es-Seyyid Mustafa Efendi necli’l-merhûmi’l-mağfûri’l-mebrûr Şeyhülislâm es-Seyyid Ali Efendi’nin necl-i necîbi sagīr es-Seyyid Mehmed Selim Molla ile kerîme-i mükerremesi sagīre Şerîfe Emine Molla’nın tesviye-i emrlerine cânib-i şer‘-i enverden mansûb vasîleri olan işbu bâ‘isü’l-kitâb es-Seyyid Hasan Çavuş Ağa b. Mehmed mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup medîne-i Üsküdar’da Mîrahor mahâllesinde vâki‘ bir tarafdan Hammâmî İsmail Ağazâde tasarrufunda olan vakıf menzil ve bir tarafdan kādı Hasan b. ( ) mülkü ve bir tarafdan ba‘zan Fâtıma Hatun ve ba‘zan Ahmed Çelebi ve ba‘zan Keresteci Mehmed Çelebi mülkleri ve bir tarafdan tarîk-i âm ile mahdûd ve hâriciye ve dâhiliyede büyût-ı adîde ve hamam ve bi’r-i mâ ve eşcâr-ı müsmire ve gayr-ı müsmireli bağçeyi müştemil mülk menzilimi vasiyy-i mezbûr es-Seyyid Hasan Çavuş Ağa’ya iki bin guruşu bi-tarîkı’l-istiğlâl bey‘ ve teslîm, ol dahi ber-vech-i muharrer sagīrân-ı mezbûrânın mâllarıyla bi’l-vesâye iştirâ ve tesellüm ve kabûl edip semeni olan meblağ-ı mezbûr iki bin guruşu sagīrân-ı mezbûrânın mâllarından olmak üzere vasiyy-i mezbûr es-Seyyid Hasan Çavuş Ağa yedinden tamâmen alıp kabz eylediğimden sonra vasiyy-i mezbûr menzil-i mahdûd-ı mezbûru ba‘de’t-tahliyeti’ş-şer‘î ve’t-tekābuzi’l-mer‘î târîh-i kitâbdan bir sene tamâmına değin iki yüz guruşa bana icâr ve teslîm, ben dahi ber-vech-i meşrûh isticâr ve tesellüm ve kabûl edip müddet-i mezbûre tamâmına değin ücret-i mezbûreden vasiyy-i mezbûra beher şehr yirmişer guruş vermek üzere ta‘ahhüd ve iltizâm eyledim dedikde gıbbe’t-tasdîkı’ş-şer‘î mûmâ-ileyh Mustafa Efendi’nin dâmâd-ı muhteremi fahrü’l-müderrisîni’l-kirâm Hasan Efendi b. ( ) dahi meclis-i şer‘de vasiyy-i mezbûr muvâcehesinde ikrâr ve takrîr-i kelâm edip meblağ-ı mezbûr hakīkatde rehin ve meblağ-ı mezbûr iki bin guruş mûmâ-ileyh Mustafa Efendi zimmetinde deyn olmağla meblağ-ı mezbûrun edâsında ve derk-i menzil-i mezbûra tarafeynden emr ü kabûlü hâvî kefâlet-i sahîha-i şer‘iyye, ben dahi kefil bi’l-mâl ve zâmin oldum dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî-gurreti Şa‘bâni’l-mu‘azzam sene 1143. Şuhûdü’l-hâl: Sadi Ali Efendi b. Mustafa, Salih Efendi b. Abdülbaki Efendi, el-Hâc Abdullah Efendi b. Hasan Efendi, Balizâde es-Seyyid Mustafa Efendi, Umdetü’l-müderrisîni’l-kirâm Tezkireci Halil Efendi, Sallabaşzâde Hasan Efendi, eş-Şeyh Ahmed Efendi kâtib, Sahhâf Mehmed Efendi