Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 444 Hüküm no: 374 Orijinal metin no: [83a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Mehmed’in hayattayken Mustafa Beşe’yi vasiyetini yerine getirmek üzere vasi tayin ettiği Husûs-ı âti’l-beyanın mahâllinde istimâ‘ ve tahrîri iltimâs olunmağın savb-ı şer‘-i enverden mezûnen Mevlânâ Hasan Efendi b. Süleyman irsâl olunup ol dahi mahmiye-i İstanbul’da Karabaş mahâllesinde sâkin iken bundan akdem vefât eden el-Hâc Ali b. Mehmed’in mahâlle-i mezbûrede nişastacı kârhânesinde vâki‘ odasına varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun ber-vech-i âtî vasiyy-i muhtârı olduğunu iddi‘â eden bâ‘isü’l-kitâb Mustafa Beşe b. Ebubekir meclis-i ma‘kūd-ı mezkûrda müteveffâ-yı mezbûrun medyûnu Hüseyin Çelebi b. Mustafa mahzarında üzerine da‘vâ ve takrîr-i [kelâm edip] müteveffâ-yı mezbûr el-Hâc Ali b. Mehmed b. Mahmud hâl-i hayâtında bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem edâ olundukdan sonra bâkī kalan terekem vilâyet-i Anadolu’da Çemişgezek kazâsına tâbi‘ Bogoş? nâm karyede sâkin zevcem Beyhan bt. Ebubekir ile sulbî kebîr oğullarım İbrahim ve Ahmed ve sagīr oğlum Mustafa’ya îsâl oluna deyü vasiyet edip tenfîzine huzûr-ı Müslimînde beni vasiyy-i muhtâr nasb u ta‘yîn, ben dahi muvâcehesinde ba‘de’l-kabûl musırran-aleyhâ fevt olmağla müteveffâ-yı mezbûrun merkūm Hüseyin Çelebi’de cihet-i karz-ı şer‘îden hakkı olan beş guruşu taleb eylediğimde vermede ta‘allül eder, suâl olunsun dedikde gıbbe’s-suâl merkūm Hüseyin Çelebi cevâbında müteveffâ-yı mezbûra cihet-i karzdan beş guruş deyni olduğunu ikrâr ve müdde‘î-i mezbûrun vesâyetini inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin Hüseyin Beşe b. Ahmed ve Mehmed Beşe b. Ömer li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-vâki‘ müteveffâ-yı mezbûr el-Hâc Ali b. Mehmed b. Mahmud hâl-i hayâtında bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra bâkī kalan terekem vilâyet-i Anadolu’da Çemişgezek kazâsına tâbi‘ Bogoş nâm karyede sâkin zevcem Beyhan bt. Ebubekir ile sulbî kebîr oğullarım İbrahim ve Ahmed ve sagīr oğlum Mustafa’ya îsâl oluna deyü vasiyet edip tenfîzine huzûrumuzda işbu müdde‘î-i mezbûr Mustafa Beşe’yi vasiyy-i muhtâr nasb u ta‘yîn, ol dahi muvâcehesinde ba‘de’l-kabûl musırran-aleyhâ vefât eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel İbrahim Çelebi b. Mehmed ve el-Hâc İbrahim b. Hüseyin ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 2 min-Şa‘bân sene 1143. Şuhûdü’l-hâl: Abdurrahman Ağa b. Mehmed, Mustafa Efendi b. Edhem, Mehmed Ağa b. Ahmed, Mustafa Odabaşı b. Abdullah, Mehmed Beşe b. Hızır