Bab Mahkemesi 54 Numaralı Sicil (H. 1102 / M. 1691) cilt: 20, sayfa: 104 Hüküm no: 77 Orijinal metin no: [12b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah ile Mehmed Dede b. Derviş’in ortak aldıkları evi nöbetleşe kullanacakları Mahmiye-i İstanbul’da Ayasofya-i Kebîr kurbunda Kabasakal Sinan Ağa mahallesi sâkinelerinden Fâtıma bt. Abdullah nâm hâtun ba‘de’t-ta‘rîfi’ş-şer‘î meclis-i şer‘-i şerîf-i enverde, Mehmed Dede b. Derviş nâm kimesne mahzarında ikrâr ve takrîr-i kelâm edip, bundan akdem Doğanî Ahmed Bey Vakfı’ndan olup icâreteyn-i ma‘lûmeteyn ile bâ-izn-i mütevellî mezbûr Mehmed Dede ile ale’l-iştirâki’s-seviy tefevvüz ve kabz eylediğimiz bir tarafdan Terzi İbrahim menzili ve bir tarafdan İbşiroğlu Mustafa menzili bir tarafdan Mehmed Efendi menzili ve bir tarafdan tarîk-i hâs ile mahdûd menzilde mezbûr Mehmed Dede ile ma‘an sâkine olmak mümkün olmamağla, bi’t-terâzî târih-i kitâbdan altı ay tamâmına değin ben sâkine olup, ba‘dehû mezbûr Mehmed Dede dahi altı ay sâkine olmak üzre münâvebeten mühâye’e-i zamânîne vechi üzre beynimizde kavl ve ittifâk eyledik dedikde, gıbbe’t-tasdîk-i vicâhî mâ vaka‘a bi’t-taleb ketb olundu. Fi’l-yevmi’s-sâdis min Cemâziyelevvel li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, İbrahim Çelebi b. Mehmed, Ebûbekir b. Hasan, Osman b. Hüseyin ve gayruhüm.