Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 454 Hüküm no: 382 Orijinal metin no: [85a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı İbrahim’in Halil’i vasiyetini yerine getirmek üzere vasi tayin ettiği Mahmiye-i İstanbul’da Saraç İshak mahâllesinde sâkin iken bundan akdem vefât eden Sandalcı es-Seyyid el-Hâc İbrahim b. es-Seyyid Abdüsselam’ın sulbî kebîr oğlu ve ber-vech-i âtî vasiyy-i muhtârı olduğunu iddi‘â eden işbu bâ‘isü’l-kitâb es-Seyyid Halil meclis-i şer‘-i hatîr-i lâzimü’t-tevkīrde müteveffâ-yı mezbûrun düyûn-ı kesîresi olmağla terekesini kabz ve düyûn-ı müsbetesini edâya kıbel-i şer‘den vasî ve kayyım nasb olunmağla terekesine bi’l-vesâye vaz‘-ı yed eden Şeyh Mehmed b. Hasan mahzarında üzerine da‘vâ ve takrîr-i kelâm edip müteveffâ-yı mezbûr Sandalcı es-Seyyid el-Hâc İbrahim b. es-Seyyid Abdüsselam b. Hüseyin hayâtında bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem edâ oluna deyü vasiyet, tenfîzine beni huzûr-ı Müslimînde vasiyy-i muhtâr nasb u ta‘yîn edip ben dahi muvâcehesinde ba‘de’l-kabûl musırran-aleyhâ fevt olmağla ber-vech-i muharrer tenfîz-i vesâyâ murâd eylediğimde mezbûr Şeyh Mehmed mâni‘ olur, suâl olunsun dedikde gıbbe’s-suâl ve’l-inkâr mezbûr Şeyh Mehmed cevâbında tereke-i müteveffâ-yı mezbûra ber-vech-i muharrer vaz‘-ı yedini ikrâr ve müdde‘î-i mezbûrun ber-vech-i mübeyyen müdde‘âsını inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Kâtib Muslihiddin mahâllesinde [sâkin] Mustafa Çelebi b. Hüseyin ve İbrahim Çelebi b. Mustafa li-ecli’ş-şehâde meclis-i ma‘kūd-ı mezkûrda hâzırân olup isre’l-istişhâd fi’l-hakīka müteveffâ-yı mezbûr Sandalcı es-Seyyid el-Hâc İbrahim b. es-Seyyid Abdüsselam b. Hüseyin hayâtında bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem edâ oluna deyü vasiyet edip tenfîzine sulbî kebîr oğlu işbu müdde‘î-i mezbûr es-Seyyid Halil’i huzûrumuzda vasiyy-i muhtâr nasb u ta‘yîn edip ol dahi muvâcehesinde ba‘de’l-kabûl musırran-aleyhâ vefât eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fî 4 min-Şa‘bân sene 1143. Şuhûdü’l-hâl: Es-Seyyid Mustafa b. el-Hâc Ömer, Şeyh Ahmed Efendi kâtib, Birâder-i imam Ahmed Efendi b. Osman, Balizâde es-Seyyid Mustafa Efendi b. ( ), Salih Çelebi b. Halil, Hasan b. Mustafa, el-Hâc İbrahim b. Osman, Ebubekir Efendi b. Ebubekir