Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 455 Hüküm no: 383 Orijinal metin no: [85a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yedikule’de misafir olarak bulunurken ölen Dimo’nun tek varisinin kardeşi Rosi olduğu Husûs-ı âti’l-beyanın mahâllinde istimâ‘ ve tahrîri için bi’l-iltimâs savb-ı şer‘-i şerîf-i enverden Mevlânâ el-Hâc İbrahim Efendi irsâl olunup ol dahi mahmiye-i İstanbul’da Tavukpazarı kurbünde Hüseyin Ağa Câmi‘-i şerîfi hareminde vâki‘ beytülmal-ı hâs emîni olanlara mahsûs odaya varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde fi’l-asl vilâyet-i Rumeli’nde Kazgan Balkanı mütemekkinlerinden olup mahmiye-i mezbûrede Yedikule’de misâfiren sâkin iken bundan akdem hâlik olan Dimo v. Dilço nâm zimmînin li-ebeveyn er karındaşı ve usûbet-i nesebiye cihetinden vârisi bâ‘isü’s-sifr Rosi nâm zimmî meclis-i ma‘kūd-ı mezkûrda hâlik-i mesfûrun zâhirde vâris-i ma‘rûfu olmayıp terekesi cânib-i beytülmala âid olmak üzere mahmiye-i mezbûrede bi’l-fi‘il beytülmal-ı hâs emîni olup terekesine bi’l-emâne vaz‘-ı yed ve ber-vech-i âtî husûmet ve redd-i cevâba kıbel-i şer‘den mezûn olan fahrü’l-akrân es-Seyyid Mustafa Ağa b. el-Hâc Ahmed mahzarında üzerine da‘vâ ve takrîr-i kelâm edip hâlik-i mesfûr Dimo zimmî ile ben li-ebeveyn karındaşlar olup babamız ismi Dilço ve dedemiz ismi Rosi ve anamız ismi Soti ve maskat-ı re’sleri mârrü’z-zikr Kazgan Balkanı olup hâlik-i mesfûrun verâseti usûbet-i nesebiye cihetinden bana münhasıra olup cihet-i merkūmeden benden gayrı vâris ve terekesine âhar müstahak yoğiken emîn-i mûmâ-ileyh bi-gayrı hakkın vaz‘-ı yed eder, suâl olunsun dedikde gıbbe’s-suâl ve’l-inkâr emîn-i mûmâ-ileyh cevâbında tereke-i hâlik-i mesfûra bi’l-emâne vaz‘-ı yedini ikrâr ve müdde‘î-i mesfûrun ber-vech-i mübeyyen müdde‘âsını inkâr edicek, müdde‘î-i mesfûrdan müdde‘âsına beyyine taleb olundukda [mahmiye-i mezbûre] zimmîlerinden udûl-i bî-garaz keferelerden olup Unkapanı kurbünde mütemekkin Diho v. Rahan ve Hıristo v. Niko nâm zimmîler li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka hâlik-i mesfûr Dimo ile işbu müdde‘iye-i mesfûre Rosi li-ebeveyn karındaşlar olup babaları ismi Dilço ve dedeleri ismi Rosi ve anaları ismi Soti ve maskat-ı re’sleri vilâyet-i Rumeli’nde Kazgan Balkanı olup hâlik-i mesfûrun verâseti usûbet-i nesebiye cihetinden müdde‘î-i mesfûra münhasıra ve terekesine cihet-i merkūmeden müdde‘î-i mesfûrdan gayrı vâris ve âhar müstahak olduğu ma‘lûmumuz değildir, biz bu husûsa bu vech üzere şâhidleriz, şehâdet [85b] dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mesfûr Rosi yine meclis-i mezbûrda emîn-i mûmâ-ileyh mahzarında bi’l-verâse ikrâr ve takrîr-i kelâm edip hâlik-i mesfûrun terekesi tahrîr ve ba‘de-ihrâci’l-masârıf ber-mûceb-i defter-i kassâm sahhü’l-bâkī kalıp emîn-i mûmâ-ileyhin bi’l-emâne makbûzu olan beş bin dört yüz akçeyi bana def‘ u teslîm, ben dahi tereke-i hâlik-i mesfûrdan olmak üzere yedinden tamâmen alıp kabz eyledim, min-ba‘d meblağ-ı mezbûr beş bin dört yüz akçeden emîn-i mûmâ-ileyh yedinde bir akçe ve bir habbe hakkım bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Hasan b. Mustafa ve Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 2 min-Şa‘bân sene 1143. Şuhûdü’l-hâl: el-Hâc İsmail Efendi b. Derviş, Ali Beşe b. Abdullah, Ahmed Çelebi b. Mustafa, Diğer Ahmed Çelebi b. Ali, Ali Beşe b. Abdullah, Kotani v. Yorgi, Simo v. Üstüyan, Hıristo v. Dimo, Deho v. Yani