Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 456 Hüküm no: 384 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın terekesi Mahmiye-i İstanbul’da Mesihpaşa mahâllesinde sâkin iken bundan akdem vefât eden Ahmed Ağa b. Ebubekir’in verâseti zevce-i menkûha-i metrûkesi Afife Hatun bt. el-Hâc Hasan ile sulbiye sagīre kızı Zeliha’ya ve li-ebeveyn er karındaşı el-Hâc İbrahim Ağa’ya ve vilâyet-i Rumeli’nde Uzuncaâbâd-ı Hasköy kazâsında Câmi‘-i atik mahâllesinde sâkin âhar li-ebeveyn er karındaşı Mehmed Ağa ile li-ebeveyn kız karındaşı Fâtıma Hatun’a münhasıra olduğu şer‘an zâhir oldukdan sonra sagīre-i mezbûrenin vâlidesi ve tesviye-i umûruna kıbel-i şer‘den mansûbe vasiyyesi mezbûre Afife Hatun ile mezbûrân Mehmed ve Fâtıma Hatun taraflarından vekîl-i nâibü’l-vekâleleri mezbûr el-Hâc İbrahim Ağa taleb ve ma‘rifetleriyle müteveffâ-yı mezbûrun tahrîr ve taksîm olunan terekesidir ki ber-vech-i âtî zikr olunur. Fî 7 min-Recebi’l-ferd sene 1143. Pandül sâ‘at 1.800 akçe Köhne sâye biniş 1.920 akçe Köhne nâfe kürk 3.600 akçe Balıkdişi kabzalı hançer 1.200 akçe Yeşil çuka bâ-sincab 1.440 akçe Sansar bogasi kaplı kürk 1.200 akçe Köhne çuka dolama 600 akçe Köhne destâr 520 akçe Yeşil çuka biniş 660 akçe Çuka çakşır 410 akçe Piştov 720 akçe Köhne kırmızı çuka biniş nâfe 840 akçe Köhne kadife yasdık gılâfı 12 1.440 akçe Köhne minder 3 480 akçe Köhne kilim ve ihrâm 2 ve kebe 2 720 akçe Evânî-i nühâs 10 kıyye, fî 12 120 akçe Yekûn: 18.760 akçe Mülk menzil der-mahâlle-i mezbûr ber-vech-i tahmîn 90.000 akçe Cem‘an yekûn: 18.760 akçe, mine’l-eşyâ. 90.000 akçe, semen-i menzil. Minhe’l-ihrâcât Techîz ve tekfîn 2.400 akçe Mehr-i müeccel li’z-zevceti’l-mezbûre 12.000 akçe Deyn-i müsbet-i Âişe bâ-hüccet 24.000 akçe Deyn-i müsbet-i Rahime bâ-hüccet 4.800 akçe Deyn-i müsbet-i Bezzâzistânî Mustafa 3.000 akçe Deyn-i müsbet-i Sarrâf Matyos zimmî 1.800 akçe Resm-i kısmet 1.500 akçe Kaydiye 45 akçe Yekûn: 49.545 akçe Sahhü’l-bâkī: 59.215 akçe Bâlâda mastûr on sekiz bin yedi yüz altmış akçe bey‘ olunan eşyâ semeni müteveffâ-yı mezbûrun masârıf ve düyûnu olan meblağ-ı mezbûr kırk dokuz bin beş yüz kırk beş akçeye kifâyet etmeyip düyûn-ı merkūmeden otuz bin yedi yüz seksen beş akçe bâkī kalmağla meblağ-ı bâkī-i merkūm menzil-i merkūm bey‘ olundukda semeninden alınmak üzere bu mahâlle şerh verildi.