Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 462 Hüküm no: 389 Orijinal metin no: [86b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Baklavacızade Kavukçu Hasan Çelebi’nin vefatı üzerine Fatıma Hatun’un terekeden hakkını aldığı Husûs-ı âti’l-beyanın mahâllinde ketb ü tahrîri için savb-ı şer‘-i şerîf-i enverden Mevlânâ Ahmed Efendi b. Osman Efendi irsâl olunup ol dahi mahmiye-i İstanbul’da Kirmasti mahâllesinde sâkin iken bundan akdem vefât eden Baklavacızâde Kavukçu Hasan Çelebi b. Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Fâtıma Hatun bt. Mehmed ile sulbî sagīr oğulları Hüseyin ve Mehmed’e ve sulbiye sagīre kızı Hadîce’ye ve sulbiye kebîre kızı diğer Fâtıma Hatun’a münhasıra ve tashîh-i meselesi kırk sekiz sehmden olmağla sihâm-ı mezbûreden altı sehim zevce-i mezbûre Fâtıma Hatun’a ve on dörder sehmi sagīrân-ı mezbûrân Hüseyin ve Mehmed’den her birine ve yedişer sehmi sagīrân-ı mezbûrân Hadîce ile mezbûre diğer Fâtıma Hatunların her birine isâbeti tahakkukundan sonra mezbûre diğer Fâtıma Hatun’un zevci ve tarafından husûs-ı âti’l-beyanda vekîl-i sâbitü’l-vekâlesi İbrahim Beşe b. Ahmed meclis-i ma‘kūd-ı mezkûrda sagīrân-ı mezbûrân Hüseyin ve Hadîce’nin vâlideleri ve tesviye-i emrlerine kıbel-i şer‘den mansûb vasiyyeleri olmağla tereke-i müteveffâ-yı mezbûra bi’l-asâle ve bi’l-vesâye vâzı‘atü’l-yed olup zâtı ta‘rîf-i şer‘î ile mu‘arrefe olan bâ‘isü’l-kitâb mezbûre Fâtıma Hatun mahzarında bi’l-vekâle ikrâr ve takrîr-i kelâm edip müteveffâ-yı mezbûrun terekesi tahrîr ve ba‘de-ihrâci’l-masârıf ve’d-düyûn tashîh-i mezbûr üzere ber-mûceb-i defter-i kassâm-ı askerî müvekkilem mezbûre diğer Fâtıma Hatun’un hissesine isâbet eden bin üç yüz on bir akçeyi vasiyye-i mezbûre Fâtıma Hatun bana def‘ u teslîm, ben dahi tereke-i müteveffâ-yı mezbûrdan olmak üzere vekâletim hasebiyle yedinden bi’t-tamâm ve’l-kemâl alıp kabz eyledim, min-ba‘d [87a] meblağ-ı mezbûr bin üç yüz on bir akçeden vasiyye-i merkūme yedinde bir akçe ve bir habbe bâkī kalmayıp tereke-i müteveffâ-yı mezbûra müte‘allıka âmme-i de‘âvî ve mutâlebât ve eymân ve muhâsamâtdan vasiyye-i mezbûrenin zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ba‘dehû ma‘an irsâl olunan Salih Çelebi b. Halil ve Salih Çelebi b. Ahmed ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 28 min-Cemâziyelevvel sene 1143. Şuhûdü’l-hâl: Feyzullah Çelebi b. Hüseyin, Mustafa Çelebi b. Mehmed, el-Hâc Mustafa b. Hasan, es-Seyyid Mehmed Çelebi b. Mustafa, Hasan Çelebi b. Mustafa, Ebubekir Efendi b. Ahmed