Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 463 Hüküm no: 390 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ahmed’in kendine ait ev ve arsadaki hissesini Ümmühani Hatun’a sattığı Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden Mevlânâ Hasan Efendizâde el-Hâc Abdullah Efendi irsâl olunup ol dahi mahmiye-i İstanbul’da Drağman Çeşmesi kurbünde Hamamcı Muhyiddin mahâllesinde Emine bt. Ahmed Ağa’nın sâkine olduğu menzile varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde zâtı ta‘rîf-i şer‘î ile mu‘arrefe olan mezbûre Emine meclis-i ma‘kūd-ı mezkûrda min-kıbeli’l-eb ceddesi olup zâtı kezâlik ta‘rîf-i şer‘î ile mu‘arrefe olan işbu bâ‘isetü’l-kitâb Ümmühani Hatun bt. A[bdullah] mahzarında ikrâr ve takrîr-i kelâm edip mahâlle-i mezbûrede vâki‘ iki tarafdan Hasan Efendi b. Hüseyin Efendi’nin tasarrufunda olan vakıf arsa ve menzil ve bir tarafdan Berber Mehmed tasarrufunda vakıf menzil ve bir tarafdan tarîk-i âm ile mahdûd ve hâriciyede fevkānî iki bâb oda ve bir sofa ve dehliz ve bir kenîf ve tahtânî bir ahır ve üzerinde bir sagīr oda ve bir kenîf ve dâhiliyede fevkānî iki bâb oda ve dehliz ve kenîf ve tahtânî bir kârgîr ocaklı matbâh ve bir harâb hamam ve bi’r-i mâ ve bir zîr-i zemîn mahzen ve bağçeyi müştemil mülk menzilin yedimde olan işbu iki kıt‘a hüccet mûcebince ebniye-i menzil-i mezbûr ile arsasının bi-tarîkı’l-münâsahati’ş-şer‘iyye on üç bin sekiz yüz yirmi dört sehmden üç bin üç yüz otuz beş sehmi cedde-i merkūme Ümmühani Hatun’un ve iki bin on altı sehmi ırsen gāibe ani’l-meclis Âişe Hatun’un ve sekiz bin dört yüz yetmiş üç sehmi ırsen ve şirâen yedimde mülk ve hakkım olmağın arsa-i menzil-i mezbûrda olan sekiz bin dört yüz yetmiş üç sehmin bin dört yüz yirmi sekiz sehim arsa hissem ile ebniye-i menzil-i mezbûrun nısf-ı şâyi‘ini cemî‘ müştemilâtıyla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûre Ümmühani Hatun’a dört yüz yetmiş altı guruşa bey‘ ve temlîk, ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr dört yüz yetmiş altı guruşu yedinden bi’t-tamâm ahz u kabz eyledim, ba‘de’l-yevm meblağ-ı mezkûr dört yüz yetmiş altı guruşdan mezbûre Ümmühani Hatun yedinde bir akçe ve bir habbe bâkī kalmayıp arsa-i mezbûrede olan bin dört yüz yirmi sekiz sehm-i şâyi‘ ile ebniye-i menzil-i mezbûrun nısf-ı şâyi‘i mezbûre Ümmühani Hatun’un mülk-i müşterâsı olmuşdur, keyfe mâ teşâ ve tahtâr mutasarrıfa olsun ve menzil-i mezbûr arsasının tashîh-i mezbûr üzere dört bin yedi yüz altmış üç sehmi ile ebniye-i menzil-i mezbûrun nısf-ı şâyi‘inde benim kat‘â alâka ve medhalim yokdur dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an mürsel Ahmed Çelebi b. İsmail ve İbrahim Çelebi b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 21 min-Receb sene 1143. Şuhûdü’l-hâl: Hasan Efendi b. Hüseyin Efendi, Süleyman Bey b. Ali, Mustafa Çelebi b. İsmail, es-Seyyid Mustafa Çelebi b. el-Hâc Ahmed, Ahmed Ağa b. Mehmed, Ömer Bey b. Mustafa ve gayruhum