Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 464 Hüküm no: 391 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeşbaşı Mustafa Ağa’dan kalan arsanın varisleri tarafından Emine Hatun’a satıldığı Kezâlik irsâl olunup ol dahi mahmiye-i İstanbul’da Drağman Çeşmesi kurbünde Hamamcı Muhyiddin mahâllesinde sâkin iken bundan akdem vefât eden Simkeşbaşı el-Hâc Mustafa Ağa b. ( ) menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkeleri Ümmühani Hatun bt. Abdullah’a ve Saliha Hatun bt. Abdullah ile sulbî kebîr oğulları Ahmed ve Halil Ağa ve sulbiye kebîre kızları Rabia Hatun ve Âişe Hatun’a münhasıra olup ve mezbûr Halil Ağa zikri âtî menzil arsasında olan hisse-i ma‘lûmesini semen-i makbûza mezbûr Ahmed Ağa’ya bey‘ ve temlîk ettikden sonra mezbûr Ahmed Ağa dahi vefât edip verâseti zevce-i menkûha-i metrûkesi diğer Rabia Hatun bt. Ahmed Ağa ile vâlidesi mezbûre Ümmühani Hatun ve sulbî kebîr oğlu İbrahim Ağa ve sulbiye kebîre kızı Emine’ye ve sagīre kızı Hadîce’ye münhasıra ve mezbûre diğer Rabia Hatun dahi kezâlik zikri âtî arsada olan hisse-i ma‘lûmesini semen-i makbûza mezbûre Ümmühani Hatun’a bey‘ ve temlîk ettikden sonra mezbûr İbrahim Ağa dahi vefât edip verâseti min-kıbeli’l-eb ceddesi mezbûre Ümmühani Hatun ile min-kıbeli’l-üm ceddesi diğer Ümmühani Hatun bt. Mahmud’a ve sulbî sagīr oğlu Mehmed Emin’e münhasıra olup lâkin mezbûr İbrahim Ağa’nın tereke-i menkūlesi semeni düyûn-ı müsbetesine vefâ etmediğinden zikri âtî arsada olan hisse-i ma‘lûmesi zarûreti düyûn-ı müsbetesi için bâ-hüccet semen-i makbûza mezbûre Emine’ye bey‘ ve temlîk olundukdan sonra sagīre-i mezbûre Hadîce dahi vefât edip verâseti [87b] min-kıbeli’l-üm ceddesi Emetullah Hatun bt. Osman Efendi ve min-kıbeli’l-eb ceddesi mezbûre Ümmühani Hatun’a ve li-eb kız karındaşı mezbûre Emine ve li-eb kız karındaşı oğlu sagīr-i mezbûr Mehmed Emin’e münhasıra ve tashîh-i meselesi bi-tarîkı’l-münâsahati’ş-şer‘iyye on üç bin sekiz yüz yirmi dört sehmden olup sihâm-ı mezbûrenin üç bin üç yüz otuz beş sehmi ırsen ve şirâen mezbûre Ümmühani Hatun’a ve sekiz yüz altmış dört sehmi mezbûre Saliha Hatun’a ve ikişer bin on altışar sehmi mezbûretân Rabia Hatun ve Âişe Hatun’dan her birine ve dört bin dokuz yüz doksan sekiz sehmi kezâlik ırsen ve şirâen mezbûre Emine’ye ve yüz on dokuz sehmi mezbûre Emetullah Hatun’a ve dört yüz yetmiş altı sehmi sagīr-i mezbûr Mehmed Emin’e isâbeti tahakkukundan sonra zâtları ta‘rîf-i şer‘î ile mu‘arrefeler olan mezbûretân Saliha Hatun ve Rabia Hatun asâleten mezbûre Emetullah Hatun’un dâmâdı ve tarafından husûs-ı âti’l-beyanda müseccel vekîli el-Hâc Süleyman b. İsmail vekâleten ve sagīr-i mezbûr Mehmed Emin’in tesviye-i umûruna bâ-hüccet vasiyy-i muhtâresi olup zâtı kezâlik ta‘rîf-i şer‘î ile mu‘arrefe olan mezbûre Ümmühani Hatun vesâyeten meclis-i ma‘kūd-ı mezkûrda zâtı kezâlik ta‘rîf-i şer‘î ile mu‘arrefe olan bâ‘isetü’l-kitâb mezbûre Emine mahzarında her biri asâleten, vekâleten ve vesâyeten ikrâr ve takrîr-i kelâm edip müteveffâ-yı evvel-i mezbûr el-Hâc Mustafa Ağa’nın ile’l-vefât yedinde mülkü olup mahâlle-i mezbûrede vâki‘ iki tarafdan Hasan Efendi tasarrufunda olan vakıf arsa ve menzil ve bir tarafdan Berber Mehmed tasarrufunda vakıf menzil ve bir tarafdan tarîk-i âm ile mahdûd fevkānî ve tahtânî büyût-ı adîde ve matbâh ve bi’r-i mâ ve zîr-i zemîn mahzen ve bir sagīr hamam ve bağçeyi müştemil işbu akd-i meclis olunan mülk menzil bin yüz kırk iki senesi Muharremünde vâki‘ harîk-i kebîrde muhterik olup arsa sırfa kalmağla arsa-i mahdûde-i mezbûreden tashîh-i mezbûr üzere bize ve müvekkile-i mezbûre ve sagīr-i mezbûra isâbet eden üç bin dört yüz yetmiş beş sehm-i şâyi‘i cemî‘ müştemilâtıyla tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile mezbûre Emine’ye yüz yirmi guruşa asâleten, vekâleten ve vesâyetim hasebiyle bey‘ ve temlîk, ol dahi ber-vech-i muharrer iştirâ ve temellük ve kabûl ettikden sonra semeni olan meblağ-ı mezbûr yüz yirmi guruşu yedinden bi-kadri’l-hısas tamâmen alıp kabz eyledik, ba‘de’l-yevm arsa-i merkūmede zikr olunan üç bin dört yüz yetmiş beş sehm-i şâyi‘ mezbûre Emine’nin mülk-i müşterâsı olmuşdur, keyfe mâ teşâ ve tahtâr mutasarrıfa olsun dediklerinde gıbbe’t-tasdîkı’ş-şer‘î vâki‘ hâli ilâ-âhırihî. Fi’t-târîhi’l-mezbûr bi-seneti’l-merkūme. Eş-şâhidûnü’s-sâbıkūn