Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 465 Hüküm no: 392 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İbrahim Ağa’ya ait evdeki hissesinin borçlarını ödemek üzere Emine Hatun’a satıldığı Kezâlik isâbeti tahakkukundan [sonra] mezbûr İbrahim Ağa dahi vefât edip verâseti min-kıbeli’l-eb ceddesi mezbûre Ümmühani Hatun ile min-kıbeli’l-üm ceddesi diğer Ümmühani Hatun bt. Mahmud ve sulbî sagīr oğlu Mehmed Emin’e münhasıra oldukdan sonra zâtı ta‘rîf-i şer‘î ile mu‘arrefe olan mezbûre Ümmühani Hatun asâleten ve sagīr-i mezbûr Mehmed Emin’in tesviye-i emrlerine bâ-hüccet-i şer‘iyye vasiyye-i muhtâreleri olmağla vesâyeten meclis-i ma‘kūd-ı mezkûrda zâtı kezâlik ta‘rîf-i şer‘î [ile] mu‘arrefe olan işbu bâ‘isetü’l-kitâb mezbûre Emine mahzarında asâleten ve vesâyeten ikrâr ve takrîr-i kelâm edip müteveffâ-yı mezbûr İbrahim Ağa’nın tereke-i menkūlesi semeni düyûn-ı müsbetesine vefâ etmeyip şer‘an emlâkının bey‘i dahi lâzım gelmeğin müteveffâ-yı evvel-i mezbûr el-Hâc Mustafa Ağa’nın ile’l-vefât yedinde mülk ve hakkı idiği müsbet olup mahâlle-i mezbûrede vâki‘ iki tarafdan Hasan Efendi tasarrufunda olan vakıf arsa ve menzil ve bir tarafdan Berber Mehmed tasarrufunda olan vakıf menzil ve bir tarafdan tarîk-i âm ile mahdûd ve dâhiliyede ve hâriciyede fevkānî ve tahtânî büyût-ı adîde ve matbâh ve bir sagīr hamam ve bir bi’r-i mâ ve bir zîr-i zemîn mahzen ve bağçeyi müştemil işbu akd-i meclis olunan mülk menzil bin yüz kırk iki senesi Muharreminde vâki‘ harîk-i kebîrde muhterik olup arsa sırfa kaldıkdan sonra mezbûr İbrahim Ağa hayâtında arsa-i mezbûre üzerinde hâriciyede fevkānî iki bâb oda ve bir sofa ve dehliz ve kenîf ve tahtânî bir ahır ve üzerinde bir sagīr oda ve kenîf ve dâhilinde fevkānî iki bâb oda ve dehliz ve kenîf ve tahtânî bir kârgîr ocaklı matbâhı kendi mâlıyla binâ etmekle ebniye-i mezkûre kendi mülkü olmağın müteveffâ-yı mezbûr İbrahim Ağa’nın tashîh-i mezbûr üzere arsada olan iki yüz otuz sekiz sehim hissesi ile ebniye-i mezkûre zarûret-i düyûn-ı müsbetesi için beyne’t-tâlibîn ba‘de’l-müzâyede ve inkıtâ‘i’r-rağbe dokuz yüz elli iki guruşda mezbûre Emine üzerinde karâr edip ziyâde ile tâlib-i âhar zuhûr etmeyip ve meblağ-ı mezkûr zikr olunan iki yüz otuz sekiz zirâ‘ arsa hissesi ile ebniye-i mezkûrenin el-yevm semen-i misli idiği zeyl-i vesîkada muharrerü’l-esâmi Müslimîn haberleriyle zâhir oldukdan sonra zikri mürûr eden iki yüz otuz sekiz sehim arsa hissesi ile ebniye-i mezkûreyi cemî‘ müştemilâtıyla tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile meblağ-ı mezkûr dokuz yüz elli iki guruşa mezbûre Emine’ye zarûret-i düyûn-ı müsbete-i müteveffâ-yı mezbûr için asâleten ve vesâyetim hasebiyle bey‘ ve temlîk ve teslîm, ol dahi ber-vech-i muharrer iştirâ ve temellük ve tesellüm ve kabz ve kabûl ettikden sonra semeni olan meblağ-ı mezkûr dokuz yüz elli iki guruş düyûn-ı müsbete ashâbına red için yedinden tamâmen ahz u kabz eyledim, ba‘de’l-yevm zikr olunan iki yüz otuz sekiz sehim arsa hissesi ile ebniye-i mezkûre dahi mezbûre Emine’nin mülk-i müşterâsı olmuşdur, keyfe mâ teşâ ve tahtâr mutasarrıfa olsun dedikde gıbbe’t-tasdîkı’ş-şer‘î vâki‘-i hâli. Fi’t-târîhi’l-mezbûr li-seneti’l-merkū[me]. Eş-şâhidûnü’s-sâbıkūn