Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 466 Hüküm no: 393 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hüseyin’in vefatıyla çocuklarına Mustafa Ağa’nın vasi, Fatıma ve Ümmügülsüm’ün ise nazır tayin edildiği Mahmiye-i İstanbul’da Davud Paşa mahâllesinde sâkin iken bundan akdem vefât eden el-Hâc Mehmed b. el-Hâc Hüseyin’in sulbî sagīr oğlu Hüseyin ve sulbiye-i sagīre kızı Hayrunnisa’nın tesviye-i emrlerine kıbel-i şer‘den bir vasî ve kayyım nasbı lâzım ve mühim olmağın emânet ile ma‘rûf ve istikāmet ile mevsûf ve her vechile vesâyet uhdesinden gelmeğe kādir idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olan sagīrân-ı mezbûrânın li-ebeveyn er karındaşları işbu bâ‘isü’l-kitâb Mustafa Ağa’yı hâkim-i muvakkı‘-ı sadr-ı kitâb bi-tevkī‘i’r-refî‘i’l-müstetâb tûbâ-lehû ve hüsnü-meâb efendi hazretleri sagīrân-ı mezbûrânın vakd-i rüşd ü sedâdlarına varınca tesviye-i emrlerine vasî ve üzerlerine halaları Hâce Fâtıma Hatun ve Ümmügülsüm Hatun ibneteyn el-mezbûr el-Hâc Hüseyin’i hasbî nâzır nasb u ta‘yîn buyurdukları[nda] onlardan dahi her biri vesâyet ve nezâret-i mezbûreyi kabûl ve hizmet-i lâzımesini kemâ-yenbağī edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fî 10 min-Şa‘bâni’l-mu‘azzam li-sene selâse ve erba‘în ve mi’e ve elf. Şuhûdü’l-hâl: Es-Seyyid Halil Efendi b. Ali, Simkeş Mehmed Çelebi b. Mustafa, Mustafa Ağa b. Mahmud, Ali Efendi b. Hasan, Mehmed Çelebi b. Ahmed, Ahmed Beşe b. Ömer, Mehmed Çelebi b. Yusuf, Mehmed Çelebi b. Ahmed, Mehmed Çelebi b. Ali, Berber Ahmed Çelebi b. Abdullah