Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 467 Hüküm no: 394 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Efendi’nin Mehmed Efendi’ye altın borcu olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Eski İmâret mahâllesinde sâkin Molla Mustafa b. Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Timurhan mahâllesi ahâlîsinden fahrü’l-müderrisîni’l-kirâm Abdülvahhab Efendi b. el-merkūm Abdullah Efendi tarafından husûs-ı âti’l-beyanda taleb ve da‘vâ ve ahz u kabza müseccel vekîli işbu bâ‘isü’l-kitâb Mehmed Efendi b. İbrahim meclis-i ma‘kūd-ı mezkûrda mahmiye-i mezbûrede sâkin iken bundan akdem vefât eden Ahmed Efendi b. el-merhûm Mehmed Emin Efendi’nin min-kıbeli’l-üm ceddesi ve terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Hadîce Hatun bt. Abdullah mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr Ahmed Efendi b. el-merhûm Mehmed Emin Efendi b. Mustafa’ya müvekkilim mûmâ-ileyh târîh-i kitâbdan bir sene mukaddem huzûr-ı Müslimînde on sekiz aded Mısır zincirli altın ikrâz ve teslîm, ol dahi ber-vech-i muharrer iktirâz ve tesellüm ve kabz ve masârıfına sarfla istihlâk etmekle meblağ-ı mezkûru müvekkilim mûmâ-ileyhe kable’l-edâ fevt olmağla terekesinden taleb ederim, suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden olup mârrü’z-zikr Timurhan mahâllesi ahâlîsinden Ahmed b. Abdullah b. Abdullah ve Mehmed Efendi b. Şaban ve Molla Mustafa b. Mehmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-vâki‘ müteveffâ-yı mezbûr Ahmed Efendi b. Mehmed Emin Efendi b. Mustafa işbu müdde‘î-i mezbûrun müvekkili mûmâ-ileyhe târîh-i kitâbdan bir sene mukaddem huzûrumuzda on sekiz aded Mısır zincirli altını ikrâz ve teslîm, ol dahi ber-vech-i muharrer yedinden iktirâz ve kabz ve masârıfına sarfla istihlâk eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’l-müvekkili’l-mezbûr mûcebiyle ba‘de’l-hükm vâki‘ hâli mevlânâ-yı mezbûr mahâllinde ketb, ba‘dehû ma‘an mürsel el-Hâc Ahmed b. Mehmed ve Mustafa Çelebi b. el-Hâc Hasan ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 3 min-Cemâziyelâhire sene 1143. Şuhûdü’l-hâl: Hacı Mustafa b. eş-Şeyh Abdullah Efendi, Halil Efendi b. Ali, el-Hâc Osman b. Kemaleddin, Hacı Halil b. Abdullah