Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 479 Hüküm no: 406 Orijinal metin no: [91a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraç Ahmed Beşe’nin terekesi ve kızı Zeliha’nın vasisi İsmail Ağa’nın hesap kaydı Mahmiye-i İstanbul’da Alipaşa-i atik mahâllesinde sâkin iken bundan akdem vefât eden Saraç Ahmed Beşe b. Abdullah’ın verâseti zevce-i menkûha-i metrûkesi Hanife Hatun bt. Abdullah ile sulbî sagīr oğlu Mehmed ve sulbiye sagīre kızı Zeliha’ya münhasıra olduğu şer‘an zâhir ve mukarrer oldukdan sonra ba‘dehû sagīr-i mezbûr Mehmed dahi fevt olup verâseti vâlidesi mezbûre Hanife Hatun ile li-ebeveyn kız karındaşı sagīre-i mezbûre Zeliha’ya ve li-ebeveyn ammi Ali Beşe b. el-mezbûr Abdullah’a münhasıra olduğu şer‘an zâhir ve mütehakkık olduk[dan sonra] verese-i mezbûrûn taleb ve ma‘rifetleriyle taksîm olunan sagīr müteveffâ-yı mezbûrun hissesidir ki ber-vech-i âtî zikr olunur. Fî 3 min-Şa‘bân sene 1143. Sagīr-i mezbûr Mehmed’in babası müteveffâ-yı mezbûrdan müntakil ber-mûceb-i defter-i mezbûr hissesi 14.154 akçe Dokuz ayda vasiyy-i mezbûrun i‘mâliyle hâsıl olan murâbaha 1.083 akçe Yekûn: 15.237 akçe Minhe’l-ihrâcât Techîz ve tekfîn 540 akçe Sagīr-i mezbûrun babasının kendi fevtine gelince dokuz ayda beher yevm beşer akçeden sagīr-i mezbûr Mehmed’in bâ-hüccet nafakasına masrûf 1.350 akçe Sagīr-i mezbûr Mehmed’in nafaka hücceti harcı için masrûf 240 akçe Sagīr-i mezbûr Mehmed’in babası müteveffâ-yı mezbûrdan müntakil vakıf menzil arsası için vakfa verilen icâreden hissesi 608 akçe Resm-i âdî 300 akçe Veresenin masrûfu 195 akçe Kaydiye 15 akçe Yekûnü’l-ihrâcât: 3.248 akçe Sahhü’l-bâkī: 12.009 akçe Hissetü’l-ümmi’l-mezbûre 4.003 akçe Hissetü’l-uhti’l-mezbûre 6.004 akçe Hissetü’l-ammi’l-mezbûr 2.002 akçe Sagīre-i mezbûre Zeliha’nın tesviye-i umûruna bâ-hüccet-i şer‘iyye vasiyy-i muhtârı olan mezbûr İsmail Ağa’nın bin yüz kırk iki senesi Recebi’l-ferdi gurresinden bin yüz kırk üç senesi Şa‘bâni’l-mu‘azzamı gurresine gelince sagīre-i mezbûrenin li-ebeveyn ammi mezbûr Ali Beşe talebiyle on üç ayda vasiyy-i mezbûrun makbûz ve masrûfunun görülen hesâbı defteridir ki ber-vech-i âtî zikr olunur. Fi’t-târîhi’l-mezbûr li-seneti’l-merkūme. Sagīre-i mezbûrenin babası müteveffâ-yı mezbûrdan müntakıl ber-mûceb-i defter-i mezbûr hissesi 7.077 akçe Müddet-i mezbûrede murâbahadan makbûz-ı vasiyy-i mezbûr 1.020 akçe Ba‘dehû fevt olan li-ebeveyn er karındaşı Mehmed’den müntakıl ber-mûceb-i defter-i mezbûre hissesi 6.004 akçe Yekûn: 14.101 akçe Minhe’l-ihrâcât Sagīre-i mezbûrenin müddet-i mezbûrede beher yevm üçer akçeden bâ-hüccet-i şer‘iyye nafakasına masrûf-ı vasiyy-i mezbûr 1.170 akçe Sagīre-i mezbûrenin nafaka hücceti harcı için masrûf 120 akçe Harc-ı hüccet-i muhâsebe 90 akçe Kalemiye 30 akçe Yekûn: 1.410 akçe Sahhü’l-bâkī bi-yedi’l-vasiyyi’l-mezbûr İsmail Ağa: 12.691 akçe