Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 483 Hüküm no: 409 Orijinal metin no: [92a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa vefat ettiğinden, terekesinin hanımıyla kızına intikal ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Şeyh Ahmed Efendi irsâl olunup ol dahi mahmiye-i İstanbul’da Seydi Ömer mahâllesi sükkânından olup diyâr-ı Acem’de Tebriz Mimarı Mehmed Ağa b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde işbu bâ‘isetü’l-kitâb Şerîfe Hadîce Hatun bt. mezbûr Mehmed Ağa b. Abdullah’ın zevci ve tarafından husûs-ı âti’l-beyanda vekîl olduğu zât-ı mezbûreyi ma‘rifet-i şer‘iyye ile ârifân Balizâde es-Seyyid Mustafa b. el-merhûm Mehmed Efendi ve Müezzin Abdullah Efendi b. Osman şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan es-Seyyid Halil Efendi b. İsmail meclis-i şer‘-i şerîf-i enverde mezbûr Mehmed Ağa’nın zevcesi olup zâtı İsmail Ağa b. Abdullah ve mezbûr Müezzin Abdullah Efendi b. Osman ta‘rîfleriyle mu‘arrefe olan Âişe Hatun bt. Ömer mahzarında bi’l-vekâle üzerine da‘vâ ve takrîr-i kelâm edip mezbûre Âişe Hatun’un zevci ve müvekkilem mezbûrenin babası olan mezbûr Mimar Mehmed Ağa b. Abdullah târîh-i kitâb senesi Muharremü’l-haram gurresinde zikr olunan Tebriz’den gelirken Kızıldağ’da mecrûh olup medîne-i Revan’da Paşa Sarayı kurbünde fevt olmağla verâseti zevce-i menkûha-i metrûkesi mezbûre Âişe Hatun ile sulbiye kebîre kızı müvekkilem mezbûre Şerîfe Hadîce Hatun’a münhasıra olmağla müteveffâ-yı mezbûrun terekesinden müvekkile-i mezbûrenin hisse-i şer‘iyye-i ma‘lûmesini taleb eylediğimde mezbûre Âişe Hatun cümle terekesine bi-gayrı hakkın vaz‘-ı yed eder, suâl olunsun dedikde gıbbe’s-suâl mezbûre Âişe Hatun cevâbında mezbûr Mehmed Ağa’nın zevcesi olmağla eşyâsına vaz‘-ı yedini ikrâr lâkin mezbûr Mehmed Ağa’nın ber-vech-i mübeyyen fevtini inkâr edicek, müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden Dergâh-ı âlî cebecilerin birinci bölüğüne mahsûs oda neferâtından ve târîh-i mezbûrda Revan’da olup hâlâ oda-i mezbûrede sâkin Mehmed Beşe b. Receb ve İbrahim Beşe b. Ahmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka mezbûr Mimar Mehmed Ağa b. Abdullah b. Abdullah târîh-i kitâb senesi Muharremü’l-haramı gurresinde medîne-i Revan’da Paşa Sarayı kurbünde fevt olmağla biz cenâzesine hâzır olup huzûrumuzda defnolundu, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Çukadâr Ali b. Hasan ve Ahmed Beşe b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 15 min-Şa‘bân sene 1143. Şuhûdü’l-hâl: Balizâde es-Seyyid Mustafa b. el-merhûm Mehmed Efendi, Bölük Ağası Süleyman Ağa b. Mehmed, el-Hâc Mehmed b. Abdullah, el-Hâc Hüseyin b. Abdullah