Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 484 Hüküm no: 410 Orijinal metin no: [92a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamide Hatun’un vasiyetini yerine getirmek üzere kocası Abdi b. Yusuf’u vasi tayin ettiği Husûs-ı âti’z-zikrin mahâllinde ketb ü tahrîri için bi’t-taleb savb-ı şer‘-i enverden Mevlânâ es-Seyyid Mahmud Efendi irsâl olunup ol dahi mahmiye-i İstanbul’da Bâyezid-i Cedîd mahâllesinde sâkin Yorganî el-Hâc Abdi b. Yusuf’un menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mezbûr el-Hâc Abdi’nin zevce-i menkûhası olup zâtı mahâlle-i mezbûrede sâkin Hüseyin Çelebi b. Mustafa ve Mustafa Çelebi b. Yusuf ta‘rîfleriyle mu‘arrefe olan Hamide Hatun bt. Mustafa meclis-i ma‘kūd-ı mezkûrda bâ‘isü’l-kitâb mezbûr el-Hâc Abdi mahzarında bi-tav‘ihâ ikrâr ve takrîr-i kelâm edip hâlâ ben alîle olup bi-emrillâhi te‘âlâ vefât eylediğimde cemî‘ terekem ahz u kabz olundukdan sonra sülüs-i mâlımdan kırk guruş ıskāt-ı salâtım için fukarâya tasadduk oluna ve tedbîr-i mutlak ile müdebbere eylediğim Bektaş’a yetmiş beş guruş ve Timurhan ve Nazike ve Tevekkül nâm hatunlardan her birine beşer guruş ve vilâyet-i Anadolu’da Mudanya kasabasında sâkin Mehmed Bey b. İbrahim nâm kimesneye yüz guruş verile ve yine sülüs-i mâlımdan beş yüz guruş vasiyy-i muhtârım re’yiyle kendi muhtârı ve menâsik-i hacc-ı şerîfe âlim bir mütedeyyin kimesneye verilip ol dahi benim için hacc-ı şerîf eyleye ve bâkī kalan terekemden zevcim merkūm nısf hissesini ba‘de’l-kabz nısf-ı âharı zât-ı rahm cihetinden vâriselerim olup mahâlle-i mezbûrede sâkineler Rukıye ve Hadîce ve Âişe benât-ı el-merkūm Pîrîzâde Ahmed Efendi beynlerinde iktisâm oluna deyü vasiyet edip tenfîzine zevcim mezbûr el-Hâc Abdi’yi vasiyy-i muhtâr nasb u ta‘yîn eyledim dedikde ol dahi ber-vech-i muharrer vesâyet-i mezbûreyi kabûl ve merâsimini edâya ta‘ahhüd ve iltizâm eylediğini mevlânâ-yı mezbûr mahâllinde tahrîr ve ma‘an mürsel Ahmed Çelebi [b.] İsmail ve Mehmed b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî-gurreti Şa‘bân sene 1143. Şuhûdü’l-hâl: Habib Efendi b. İbrahim el-İmam, Osman Efendi el-Müezzin, Molla İbrahim b. ( ) el-Kayyım, Abdi Çelebi b. el-Hâc Mehmed, es-Seyyid Mustafa Çelebi b. Ahmed, Hüseyin Çelebi b. Süleyman, es-Seyyid İshak Çelebi b. Ahmed, es-Seyyid Mehmed Çelebi b. Ahmed, Mustafa Çelebi b. Yusuf