Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 494 Hüküm no: 418 Orijinal metin no: [94b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa’nın malının üçte birini kardeşi Ali Çelebi’ye verilmesini vasiyet ettiği Mahmiye-i İstanbul’da Üskübî mahâllesinde sâkin iken bundan akdem vefât eden kolancı tâifesinden Moralı el-Hâc Mustafa b. Aziz’in li-ebeveyn er karındaşı ve ber-vech-i âtî mûsâ-lehi olduğunu iddi‘â eden işbu bâ‘isü’l-kitâb Ali Çelebi b. el-mezbûr Aziz meclis-i şer‘-i hatîr-i lâzımü’t-tevkīrde müteveffâ-yı mezbûrun li-ebeveyn kız karındaşı ve sulbî sagīr oğlu Mehmed ve sulbiye sagīre kızı Hadîce’nin tesviye-i emrlerine bâ-hüccet-i şer‘iyye vasiyy-i muhtâreleri olmağla terekesine bi’l-vesâye vâzı‘atü’l-yed olup zâtı ta‘rîf-i şer‘î ile mu‘arrefe olan Âişe Hatun bt. el-mezbûr Aziz ile müteveffâ-yı mezbûrun zevce-i menkûha-i metrûkesi olup zâtı kezâlik ta‘rîf-i şer‘î ile mu‘arrefe olan Meryem Hatun bt. Hüseyin mahzarlarında üzerlerine da‘vâ ve takrîr-i kelâm edip karındaşım müteveffâ-yı mezbûr Moralı el-Hâc Mustafa b. el-mezbûr Aziz b. Ali hâl-i kemâl-i sıhhatinde işbu bin yüz kırk üç senesi Muharreminde vilâyet-i Rumeli’nde medîne-i Ruscuk’da Osman Ağa’nın odasında bi-emrillâhi te‘âlâ fevtinden sonra sülüs-i mâlı bana verilsin deyü huzûr-ı Müslimînde vasiyet edip musırran-aleyhâ fevt olmağla müteveffâ-yı mezbûrun terekesinin sülüsünü vasiyy-i mezbûr ile zevce-i mezbûreden taleb eylediğimde bana vermede ta‘allül ederler suâl olunsun dedikde gıbbe’s-suâl mezbûretân cevâblarında tereke-i müteveffâ-yı mezbûra ber-vech-i muharrer vaz‘-ı yedlerini ikrâr ve müdde‘î-i mezbûrun ber-vech-i mübeyyen müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden medîne-i mezbûrede Hacı Mehmed Mescidi imamı olup mahmiye-i mezbûrede Sultân Mehmed Câmi‘-i şerîfi kurbünde misâfiren sâkin Mustafa Halîfe b. Ahmed ve yine medîne-i mezbûrede Şeyh mahâllesi ahâlîsinden olup mahmiye-i mezbûrede Unkapanı dâhilinde Nalband el-Hâc Mehmed dükkânında misâfiren sâkin Mehmed Beşe b. Ali li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Moralı el-Hâc Mustafa b. Aziz b. Ali hâl-i kemâl-i sıhhatinde işbu bin yüz kırk üç senesi Muharreminde medîne-i mezbûrede Osman Ağa’nın odasında bi-emrillâhi te‘âlâ fevtimden sonra sülüs-i mâlım işbu müdde‘î-i mezbûr için karındaşım Ali Çelebi’ye verilsin deyü huzûrumuzda vasiyet edip musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sâlis aşer min-Şa‘bâni’l-mu‘azzam sene selâse ve erba‘în ve mi’e ve elf. Şuhûdü’l-hâl: İskilibî Mehmed Efendi b. Mahmud, es-Seyyid Mustafa Efendi b. Mehmed Efendi Balizâde, el-Hâc İbrahim b. Hüseyin, el-Hâc Mustafa Çelebi b. Ali ve gayruhum