Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 495 Hüküm no: 419 Orijinal metin no: [94b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Mehmed vasiyetini yerine getirmek üzere hanımı Ayşe Hatun’u vasi tayin ettiği Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden Mevlânâ Hasan Efendizâde el-Hâc Abdullah Efendi irsâl olunup ol dahi mahmiye-i İstanbul’da Molla Hüsrev mahâllesinde sâkin el-Hâc İsmail b. el-Hâc Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mezbûr el-Hâc İsmail b. el-Hâc Mehmed b. İsmail meclis-i ma‘kūd-ı mezkûrda zevce-i menkûhası olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Âişe Hatun bt. el-Hâc Hasan mahzarında bi’t-tav‘i’s-sâf ikrâr-ı tâm ve takrîr-i kelâm edip bi-emrillâhi te‘âlâ vefât eylediğimde cemî‘ terekem ahz u kabz olunup vech-i mesnûn üzere levâzım-ı [95a] techîz ve tekfînim görülüp ve zevcem mezbûre zimmetimde mütekarrer yüz guruş mehr-i müeccelini ba‘de’l-kabz üç bin akçe ıskāt-ı salâtım ve kefâret-i savm ve yemînim için fukarâya tasadduk oluna ve üç bin akçe ile eyyâm-ı mübârekede tabh-ı ta‘âm ve it‘âm-ı fukarâ oluna ve bâkī terekenin rub‘unu zevcem mezbûre Âişe Hatun’a bi-hükmi’l-farz ve selâse-i erbâ‘ını dahi benim kat‘â vâris ve vârisem olmamağla bi-hükmi’l-vasiyet ahz u kabz eylesin deyü vasiyet edip tenfîzine zevcesi mezbûre Âişe Hatun’u vasiyy-i muhtâre nasb u ta‘yîn ettikde ol dahi vasiyet-i mezbûreyi kabûl ve merâsimini edâya ta‘ahhüd ve iltizâm eylediğini mevlânâ-yı mezbûr mahâllinde tahrîr ve ba‘dehû ma‘an [mürsel] İbrahim b. Halil ve Abdurrahman b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 18 min-Şa‘bâni’l-mu‘azzam sene 1143. Şuhûdü’l-hâl: İskilibî Mehmed Efendi b. Mahmud, Hüseyin Efendi b. Mustafa el-imâm, Molla Mustafa b. Halil, Süleyman Çelebi b. Mehmed, Ali Çelebi b. Mustafa, Mustafa Çelebi b. Mehmed, İbrahim Çelebi b. Osman, Müezzin el-Hâc Mehmed b. el-Hâc Esad, el-Hâc İbrahim b. Mahmud, Mustafa Çelebi b. el-Hâc Yusuf