Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 496 Hüküm no: 420 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed’in, vefat eden Mehmed’in vekili olduğunu ispatladığı Fi’l-asl vilâyet-i Anadolu’da Harput kazâsına tâbi‘ Helezor karyesi ahâlîsinden olup mahmiye-i İstanbul’da Uzun Şüca‘ mahâllesinde sâkin iken bundan akdem vefât eden el-Hâc Mehmed’in babası Ali’nin tarafından ber-vech-i âtî vekâlet iddi‘â eden işbu bâ‘isü’l-kitâb Ahmed b. ( ) meclis-i şer‘-i şerîf-i enverde müteveffâ-yı mezbûrun evlâd-ı sıgārının bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘atü’l-yed olan Emine Hatun bt. Mehmed’in oğlu ve tarafından müseccel vekîli Mehmed Çelebi b. İbrahim mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr el-Hâc Mehmed vekîli olduğum karye-i mezbûrede sâkin Ali b. Abdullah b. Abdullah’ın firâşından hâsıl ve zevcesi müteveffiye Âişe bt. Süleyman’dan mütevellide sulbî oğlu olup maskat-ı re’si karye-i mezbûredir ve müteveffâ-yı mezbûrun verâseti müvekkilim mezbûr ile mahâlle-i mezbûrede sâkine zevce-i menkûha-i metrûkesi Âişe Hatun bt. İbrahim ile sulbî sagīr oğlu Mustafa ve sulbiye sagīre kızı Hanife’ye münhasıra olmağla müvekkilim mezbûr Ali südüs hisse-i şer‘iyyesini tereke-i müteveffâ-yı mezbûra vâzı‘ü’l-yed olanlardan taleb ü da‘vâ ve ahz u kabza ve kendüye îsâle ve lede’l-iktizâ sulh ve ibrâya ve bunlar mevsûf olduğu umûrun küllîsine karye-i mezbûrede huzûr-ı Müslimînde beni vekîl ve nâib-i menâb nasb u ta‘yîn ettikde ben dahi vekâlet-i mezbûreyi kabûl etmeğin hâlâ vasiyye-i mezbûre Emine Hatun tereke-i müteveffâ-yı mezbûra vaz‘-ı yed edip müvekkilim mezbûrun südüs hisse-i şer‘iyyesini bana teslîmden imtinâ‘ eder suâl olunsun dedikde gıbbe’s-suâl vekîl-i mezbûr cevâbında müvekkilesi mezbûre Emine Hatun tereke-i müteveffâ-yı mezbûra ber-vech-i muharrer vaz‘-ı yedini ikrâr lâkin müvekkil-i mezbûrun ber-vech-i mübeyyen verâseti ve müdde‘î-i mezbûrun vekâletini inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden fi’l-asl karye-i mezbûr sükkânından olup mahmiye-i mezbûrede Kumkapı kurbünde sâkin Ali b. Receb ve İbrahim Beşe b. Halil li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed müvekkil-i mezbûr Ali b. Abdullah b. Abdullah’ın firâşından hâsıl ve zevcesi müteveffiye Âişe bt. Süleyman’dan mütevellid sulbî oğlu olup ve maskat-ı re’si Harput kazâsına tâbi‘ Helezor karyesidir ve müteveffâ-yı mezbûrun verâseti müvekkil-i mezbûr Ali ile zikr olunan Uzun Şüca‘ mahâllesinde sâkine zevce-i menkûha-i metrûkesi Âişe Hatun bt. İbrahim ve sulbî sagīr oğlu Mustafa’ya ve sulbiye sagīre kızı Hanife’ye münhasıradır, gayrı vâris ve terekesine müstahakk-ı âhar olduğu ma‘lûmumuz değildir mezbûr Ali müteveffâ-yı mezbûrun terekesine vâzı‘ü’l-yed olanlardan taleb ve da‘vâ ve ahz u kabza ve kendüye îsâle ve lede’l-iktizâ sulh ve ibrâya ve bunlar mütevakkıf olduğu umûrun küllîsine tarafeynden işbu müdde‘î-i mezbûr Ahmed karye-i mezbûrede bizim huzûrumuzda vekîl ve nâib-i menâb nasb u ta‘yîn edip ol dahi muvâcehesinde vekâlet-i mezbûreyi kabûl ve merâsimini edâya ta‘ahhüd ve iltizâm eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fî 19 min-Şa‘bân sene 1143. Şuhûdü’l-hâl: Mehmed Çelebi b. Hüseyin, Hasan Beşe b. Abdullah, Halil Çelebi b. Ahmed, Mustafa Çelebi b. el-Hâc Ahmed, Ahmed Çelebi b. Hasan