Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 497 Hüküm no: 421 Orijinal metin no: [95a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimar Mehmed Ağa’nın vefatıyla hanımı Ayşe Hatun’un terekedeki hakkını tamamen aldığı Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûn mevlânâ Şeyh Ahmed Efendi irsâl olunup ol dahi mahmiye-i İstanbul’da Seydi Ömer mahâllesi ahâlîsinden olup diyâr-ı Acem’de medîne-i Revan’da bundan akdem vefât eden Mimar Mehmed Ağa b. Abdullah’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Âişe Hatun bt. Ömer ile sulbiye kebîre kızı Şerîfe Hadîce Hatun’a münhasıra ve tashîh-i meselesi sekiz sehmden olmağla sihâm-ı mezbûrenin bir sehmi zevcesi mezbûreye ve yedi sehmi farzan ve redden mezbûre Şerîfe Hadîce Hatun’a isâbeti tahakkukundan sonra zâtı mahâlle-i mezbûre sükkânından İsmail Efendi b. Abdullah ve Müezzin Abdullah Efendi b. Osman ta‘rîfleriyle mu‘arrefe olan mezbûre Âişe Hatun meclis-i ma‘kūd-ı mezkûrda mezbûre Şerîfe Hadîce Hatun’un zevci ve tarafeynden husûs-ı âti’l-beyanda ibrâ ve tasdîka vekîli olduğu zât-ı mezbûru ma‘rifet-i şer‘iyye ile ârifân Balizâde es-Seyyid Mustafa Efendi b. el-merhûm Mehmed Efendi ve mezbûr Müezzin Abdullah Efendi şehâdetleriyle mahzar-ı hasm-ı câhidde sâbit ve sübût-ı vekâlete hükm-i şer‘î lâhık olan es-Seyyid Halil Efendi b. İsmail Efendi mahzarında ikrâr ve takrîr [95b] edip müteveffâ-yı mezbûrun terekesini tahrîr ve ba‘de-ihrâci’l-masârıf ve’d-düyûn ber-mûceb-i defter-i kassâm-ı askerî tashîh-i mezbûr üzere sümün hisseme isâbet eden yirmi dokuz bin dört yüz doksan yedi akçe ve zevcim müteveffâ-yı mezbûr zimmetinde mütekarrer ve ma‘kūdün-aleyh on sekiz bin akçe mehr-i müeccelim ve cihet-i deyn-i şer‘îden hakkım olan yirmi dört bin akçe ki cem‘an yetmiş bir bin dört yüz doksan yedi akçeyi vekîl-i mezbûr bana def‘ ve teslîm ben dahi tereke-i müteveffâ-yı mezbûrdan olmak üzere yedinden tamâmen alıp kabz eyledim min-ba‘d meblağ-ı mezbûrdan müvekkile-i mezbûre ile vekîl-i mezbûr yedinde ve zimmetinde bir akçe ve bir habbe bâkī kalmayıp tereke-i müteveffâ-yı mezbûra müte‘allıka âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Çukadâr Ali Çelebi b. Mehmed ve İbrahim b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 17 min-Şa‘bân sene 1143. Şuhûdü’l-hâl: Süleyman Ağa b. Mehmed, el-Hâc Mehmed b. Abdullah, el-Hâc Hüseyin b. Abdullah, Topçu Süleyman Ağa b. ( ), İmam Mehmed Efendi b. Hasan, Molla Abdurrahman b. Hasan, Molla Mustafa b. Mehmed, Mehmed Çelebi b. el-Hâc Mehmed, Hasan Çelebi b. Mehmed, Mehmed b. İbrahim