Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 498 Hüküm no: 422 Orijinal metin no: [95b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdullah’ın vefat eden Dökmeci Ömer Beşe’de alacağı olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden Mevlânâ el-Hâc Feyzullah Efendi b. el-merhûm Mehmed Efendi irsâl olunup ol dahi mahmiye-i İstanbul’da Unkapanı dâhilinde İstanbul Ağası Hanı’nda sâkin iken bundan akdem fevt olan Dökmeci Ömer Beşe b. Mustafa’nın odasına varıp zeyl-i vesîkada muharrerü’l-esâmi Müslimîn huzûrlarında akd-i meclis-i şer‘-i şerîf ettikde han-ı mezbûr sükkânından işbu bâ‘isü’l-kitâb Ahmed b. Abdullah meclis-i ma‘kūd-ı mezkûrda müteveffâ-yı mezbûrun vesâyâ-yı mu‘ayyenesini tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan Mustafa Usta b. Abdurrahman mahzarında üzerine da‘vâ ve takrîr-i kelâm edip müteveffâ-yı mezbûr Dökmeci Ömer Beşe b. Mustafa b. Abdurrahman zimmetinde cihet-i karz-ı şer‘îden seksen guruş hakkım olup hattâ müteveffâ-yı mezbûr Ömer Beşe hayâtında fevtinden bir ay mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd dahi edip meblağ-ı mezbûru kable’l-ahz fevt olmağla terekesinden taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına mutâbık beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Sultân odalarında sâkin Mehmed Odabaşı b. İbrahim ve Âşık Paşa mahâllesinde sâkin Dökmeci Mustafa Çelebi b. el-Hâc Hüseyin li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Dökmeci Ömer Beşe b. Mustafa b. Abdurrahman hayâtında fevtinden bir ay mukaddem işbu müdde‘î-i mezbûr Ahmed Beşe’ye cihet-i karz-ı şer‘îden seksen guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel el-Hâc İbrahim b. Hüseyin ve Çukadâr Ahmed Çelebi b. Abdullah meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 5 min-Şa‘bân sene 1143. Şuhûdü’l-hâl: Es-seyyid Ebubekir Çelebi b. Kasım, İsmail Çelebi b. el-Hâc Mustafa, Mehmed Çelebi b. Halil, İsmail Beşe b. Mehmed, Yusuf Beşe b. Abdullah câbî