Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 499 Hüküm no: 423 Orijinal metin no: [95b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dökmeci İsmail Çelebi’nin vefat eden Dökmeci Ömer Beşe’de alacağı olduğu Kezâlik akd-i meclis-i şer‘-i şerîf ettikde han-ı mezbûr kurbünde sâkin işbu bâ‘isü’l-kitâb Dökmeci İsmail Çelebi b. el-Hâc Mustafa meclis-i ma‘kūd-ı mezkûrda müteveffâ-yı mezbûrun vesâyâ-yı mu‘ayyenesini tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan Mustafa Usta b. Abdurrahman mahzarında üzerine da‘vâ ve takrîr-i kelâm edip müteveffâ-yı mezbûr Dökmeci Ömer Beşe b. Mustafa b. Abdurrahman zimmetinde ciheti karz-ı şer‘den elli guruş hakkım olup hattâ müteveffâ-yı mezbûr hayâtında fevtinden bir ay mukaddem meblağ-ı mezbûru cihet-i merkūmeden zimmetinde bana edâsı vâcib deyni olduğunu huzûr-ı Müslimînde ikrâr ve işhâd dahi edip meblağ-ı mezbûru kable’l-ahz fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Koğacı Dede mahâllesinde sâkin el-Hâc Süleyman b. Abdullah ve Âşık Paşa mahâllesinde sâkin Dökmeci Mustafa Çelebi b. el-Hâc Hüseyin li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Dökmeci Ömer Beşe b. Mustafa b. Abdurrahman hayâtında fevtinden bir ay mukaddem işbu müdde‘î-i mezbûr İsmail Çelebi’ye cihet-i karz-ı şer‘îden elli guruş zimmetinde edâsı vâcib deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn