Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 500 Hüküm no: 424 Orijinal metin no: [95b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dökmeci Ömer Beşe’nin vefatından önce vasiyetini yerine getirmek üzere Mustafa Usta’yı vasi tayin ettiği Kezâlik akd-i meclis-i şer‘-i şerîf ettikde müteveffâ-yı mezbûrun verâseti li-ebeveyn er karındaşı Hasan Ağa ile li-ebeveyn kız karındaşı Fâtıma Hatun ve vilâyet-i Anadolu’da Kastamonu sancağına tâbi‘ Çanak nâm karyede sâkine âhar li-ebeveyn kız karındaşı Kerime evlâdı Mustafa’ya münhasıra olduğu şer‘an zâhir ve mukarrer oldukdan sonra müteveffâ-yı mezbûrun ber-vech-i âtî vasiyy-i muhtârı olduğunu iddi‘â eden işbu bâ‘isü’l-kitâb Mustafa Usta b. Abdullah meclis-i ma‘kūd-ı mezkûrda müteveffâ-yı mezbûrun terekesine bi’l-verâse vâzı‘ü’l-yed olan mezbûr Hasan Ağa mahzarında üzerine da‘vâ ve takrîr-i kelâm edip müteveffâ-yı mezbûr Ömer Beşe b. Mustafa b. Abdurrahman hâl-i marazında bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup düyûn-ı müsbetem kazâ olundukdan sonra bâkī terekemin sülüsünden yirmi beş guruş ıskāt-ı salât ve kefâret-i savm ve yemînim için fukarâya tasadduk oluna ve onar guruş hediyeli iki mushaf-ı şerîf alınıp müstahıkkīnden birer kimesneye verile ve sülüs-i mezbûrdan altmış guruşa [96a] bir sîm çapraz kuşak iştirâ olunup Dergâh-ı âlî yeniçerilerinin yirmi bir bölük odasına vakf olup verile deyü vasiyet edip tenfîzine ve gāibe-i mezbûrenin hisse-i ırsiyesini ahz u kabz ve hıfza huzûr-ı Müslimînde beni vasiyy-i muhtâr nasb u ta‘yîn eyledikde ben dahi muvâcehesinde ba‘de’l-kabûl musırran-aleyhâ vefât edip terekesinin sülüsü meblağ-ı mûsâ-bih-i mezkûra müsâ‘id olmağın tenfîz-i vesâyâ murâd eylediğimde mezbûr Hasan Ağa mâni‘ olur suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Sultân (...) sâkin Mehmed Odabaşı b. İbrahim ve Âşık Paşa mahâllesinde sâkin Dökmeci Mustafa Çelebi b. el-Hâc Hüseyin li-ecli’ş-şehâde (...) mezkûra hâzırân olup isre’l-istişhâd fi’l-hakīka müteveffâ-yı mezbûr Dökmeci Ömer Beşe b. Mustafa b. Abdurrahman hâl-i marazında vefât eylediğimde cemî‘ terekem ve zimem-i nâsda olan hukūkum ahz u kabz olunup düyûn-ı müsbetem kazâ olundukdan sonra bâkī terekemin sülüsünden yirmi beş guruş ıskāt-ı salât ve kefâret-i savm ve yemînim için fukarâya tasadduk oluna ve onar guruş hediyeli iki mushaf-ı şerîf alınıp müstahıkkīnden birer kimesneye verile ve sülüs-i müzbûrdan altmış guruşa bir sîm çapraz kuşak iştirâ olunup zikr olunan yirmi bir bölük odasına vakf olup verile deyü vasiyet edip tenfîzine ve gāibe-i mezkûrenin hisse-i ırsiyesini ahz u kabz ve zabt u hıfza işbu müdde‘î-i mezbûr Mustafa Usta’yı huzûrumuzda vasiyy-i muhtâr nasb u ta‘yîn eyledikde ol dahi muvâcehesinde ba‘de’l-kabûl musırran-aleyhâ vefât edip terekesinin sülüsü meblağ-ı mûsâ-bih-i mezkûra müsâ‘iddir biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel el-Hâc İbrahim b. Hüseyin ve Ahmed Çelebi b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 9 min-Şa‘bân sene 1143. Şuhûdü’l-hâl: Yusuf Beşe b. Abdullah, İsmail b. el-Hâc Mustafa, Mehmed b. Halil, Ahmed Çelebi b. Mehmed, es-Seyyid Ebubekir b. ( ), Ömer Çelebi b. Mehmed