Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 501 Hüküm no: 425 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bali v. Fortel’in vefat eden Ali Ağa’da alacağı olduğu Mahmiye-i İstanbul’da Mahmudpaşa mahâllesi sâkinlerinden işbu râfi‘ü’s-sifr Bali v. Fortel nâm zimmî meclis-i şer‘-i hatîr-i lâzımü’t-tevkīrde Havâss-ı refî‘a muzâfâtından Kınıklı? kasabasında sâkin iken bundan akdem vefât eden Ali Ağa b. İbrahim’in sulbiye kebîre kızı olmağla terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Fâtıma Hatun ile li-ebeveyn kız karındaşı Ümmühani Hatun tarafından bâ-hüccet-i şer‘iyye vekîli zevci el-Hâc Ali b. Ahmed mahzarında üzerlerine da‘vâ ve takrîr-i kelâm edip benim müteveffâ-yı mezbûr Ali Ağa b. İbrahim b. Aydın zimmetinde cihet-i karzdan yüz guruş hakkım olup hattâ müteveffâ-yı mezbûr hâl-i sıhhatinde meblağ-ı mezbûr cihet-i merkūmeden zimmetinde vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mesfûrdan müdde‘âsına beyyine taleb olundukda udûl-i ahrâr-ı ricâl-i Müslimînden Pirinçci Sinan mahâllesi sükkânından Mahmud Efendi b. Hasan ve Mustafa Ağa b. Mehmed li-ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka müteveffâ-yı mezbûr Ali Ağa b. İbrahim b. Aydın hâl-i sıhhatinde müdde‘î-i mesfûr Bali v. Fortel zimmîye cihet-i karzdan yüz guruş zimmetinde vâcibü’l-edâ deyni olduğunu bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın ba‘de’t-tahlîfi’ş-şer‘î mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’l-ışrîn min-Şa‘bân sene 1143. Şuhûdü’l-hâl: Umdetü’l-kuzâti’l-kirâm Mehmed Arif Efendi b. Ali Efendi, fahrü’l-kuzât Mustafa Efendi b. Mahmud, es-Seyyid el-Hâc Ali b. Seydi, Mustafa Çelebi b. İbrahim