Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 502 Hüküm no: 426 Orijinal metin no: [96a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın vefat eden Ali Ağa’da alacağı olduğu Havâss-ı refî‘a kazâsı muzâfâtından Silivri kasabası sâkinlerinden bâ‘isü’l-kitâb Ahmed Ağa b. Sinan b. Abdullah tarafından husûs-ı âti’l-beyanda vekîl olduğu Halil Ağa b. Mustafa ve Mustafa Ağa b. Mehmed şehâdetleriyle mahzar-ı hasm-ı câhidde sâbit ve mahkûmün-bih Mustafa Efendi b. Mahmud Efendi mahmiye-i İstanbul’da meclis-i şer‘-i şerîf-i enverde kazâ-i mezbûra tâbi‘ kasaba-i Kınıklı’da sâkin iken bundan akdem vefât eden Ali Ağa b. İbrahim’in sulbiye kebîre kızı olmağla terekesine bi’l-verâse vâzı‘atü’l-yed olup zâtı ta‘rîf-i şer‘î ile mu‘arrefe olan Fâtıma Hatun ile li-ebeveyn kız karındaşı Ümmühani Hatun tarafından bâ-hüccet-i şer‘iyye vekîli ve zevci el-Hâc Ali b. Ahmed mahzarlarında bi’l-vekâle üzerlerine da‘vâ ve takrîr-i kelâm edip müvekkilim mezbûr Ahmed Ağa’nın müteveffâ-yı mezbûr Ali Ağa b. İbrahim b. Aydın zimmetinde cihet-i karzdan bâkī elli guruş hakkı olup hattâ müteveffâ-yı mezbûr hâl-i sıhhatinde meblağ-ı bâkī-i mezbûr cihet-i merkūmeden müvekkilim mezbûr zimmetinde vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına [96b] [beyyine taleb olundukda] udûl-i [ahrâr-ı ricâl-i] Müslimînden şâhidân (...) Halil Ağa b. Mustafa ve Mustafa Ağa b. Hamid li-ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka müteveffâ-yı mezbûr Ali Ağa b. İbrahim b. Aydın hâl-i sıhhatinde müvekkil-i mezbûr Ahmed Ağa b. Sinan b. Abdullah’a ciheti karzdan bâkī elli guruş zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi bi bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mevkūfen alâ-yemîni’l-müvekkili’l-mezbûr mûcebiyle ba‘de’l-hükm mâ-vaka‘a bi’t-taleb ketb olundu. Fî 14 min-Şa‘bân sene 1143. Şuhûdü’l-hâl: Mustafa Çelebi b. İbrahim, Mustafa Ağa b. Mehmed, el-Hâc Halil b. Mehmed, Abdullah Çelebi b. Ebubekir