Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 502 Hüküm no: 427 Orijinal metin no: [96b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Masraf’ın vefat eden Mustafa’dan aldığı borcu hayattayken ödemiş olduğu Mahmiye-i İstanbul’da Sekbânbaşı Yakub Ağa mahâllesi sâkinlerinden iken bundan akdem fevt olan Silahşor Camusçu el-Hâc Mustafa b. Seydi Bey’in verâseti mahâlle-i mezbûrede sâkine zevce-i menkûha-i metrûkesi Âişe Hatun bt. Abdullah ve vilâyet-i Anadolu’da medîne-i Adana’da âhar zevce-i metrûkesi Hadîce bt. Abdurrahman ve Elife bt. İbrahim ve Âişe bt. Ahmed nâm hatunlar ile sulbiye kızları Âişe ve Ümmü Gülsüm’e münhasıra olduğu şer‘an zâhir oldukdan sonra müteveffâ-yı mezbûrun medîne-i Adana’da sâkine zevce-i metrûkeleri Hadîce bt. Abdurrahman b. Abdullah ve Elife bt. İbrahim b. Abdülmennan ve Âişe bt. Ahmed b. Abdürrezzak ve sulbiye kızları Âişe ve Ümmü Gülsüm’ün tereke-i müteveffâ-yı mezbûrdan hisselerini ahz u kabza ve hıfz u zabta kıbel-i şer‘den vasî nasb olunan Ahmed b. Seydi nâm kimesne meclis-i şer‘-i hatîr-i lâzımü’t-tevkīrde işbu râfi‘ü’s-sifr Sarrâf Masraf v. Ağazar nâm zimmî muvâcehesinde üzerine da‘vâ ve takrîr-i kelâm edip müteveffâ-yı mezbûr Camusçu el-Hâc Mustafa’nın mesfûr Masraf zimmetinde cihet-i karzdan bin seksen guruş hakkı olup taleb eylediğimde vermede ta‘allül eder suâl olunup bi’l-vesâye alıverilmesi matlûbumdur dedikde gıbbe’s-suâl mesfûr Masraf cevâbında fi’l-hakīka müteveffâ-yı mezbûrun cihet-i mezkûreden zimmetimde yalnız bin guruş hakkı var idi lâkin hâl-i sıhhatinde meblağ-ı merkūm bin guruşu müteveffâ-yı mezbûr el-Hâc Mustafa Ağa b. Seydi b. Abdullah’a huzûr-ı Müslimînde bi’t-tamâm ve’l-kemâl edâ ve teslîm eyledim deyü def‘le mukābele edicek def‘-i meşrûhunu mübeyyin beyyine taleb olundukda udûl-i ahrâr-ı ricâl-i Müslimînden Lâleliçeşme mahâllesi sâkinlerinden el-Hâc Murtaza b. Hüseyin ve el-Hâc Hasan b. Murtaza li-ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka mesfûr Masraf v. Ağazar müteveffâ-yı mezbûr Camusçu el-Hâc Mustafa Ağa b. Seydi Bey b. Abdullah’a deyni olan bin guruşu bizim huzûrumuzda bi’t-tamâm ve’l-kemâl edâ ve teslîm ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘î-i mezbûr Ahmed b. Seydi bî-vech mu‘ârazadan men‘ birle mâ-vaka‘a bi’t-taleb ketb olundu. Fî 2 min-Şa‘bân sene 1143. Şuhûdü’l-hâl: Umdetü’l-müderrisîni’l-kirâm Âtıf Mehmed Efendi, Alizâde Mehmed Arif Efendi b. Ali, Ali Çelebi b. Mehmed, Hüseyin Çelebi b. Abdurrahman, Abdülbaki b. Ahmed