Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 34 Hüküm no: 3 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Şakir’in eşi Seher’e mehr-i muacceli ödemesi Ma‘rûz, İstanbul’da Ebulfeth Gāzî Sultân Mehmed Han -aleyhi’r-rahmetü ve’l-gufrân- hazretleri câmi‘-i şerîfi kurbünde Hoca Hayreddin mahâllesinde sâkine bâ‘isetü’l-i‘lâm mu‘errefetü’z-zât Seher Hatun bt. Ali mahfil-i şer‘iyyâtda hâlâ zevci attâr esnâfından es-Seyyid el-Hâc Mehmed Şakir Efendi b. es-Seyyid el-Hâc İbrahim muvâcehesinde mezbûr es-Seyyid el-Hâc Mehmed Şakir Efendi altı yüz bir guruş mehr-i mu‘accel ve altı yüz guruş mehr-i müeccel tesmiyeleriyle zevc-i dâhilim olup lâkin mehr-i mu‘accel-i mezkûrum olan altı yüz bir guruşu henüz bana edâ ve îfâ etmemekle suâl olunup mehr-i mu‘accel-i mezkûr altı yüz bir guruşu hâlâ bana edâ ve teslîme zevcim mezbûr es-Seyyid Mehmed Şakir Efendi’ye tenbîh olunmak murâdımdır deyü ba‘de’d-da‘vâ ve’l-istintâk, ol dahi cevâbında müdde‘iye-i mezbûre Seher Hatun ol mikdâr guruş mehr-i mu‘accel ve müeccel tesmiyeleriyle zevce-i menkûha-i medhûlün-bihâsı olup ve mehr-i mu‘accel-i mezkûru olan altı yüz bir guruşu müdde‘iye-i mezbûre Seher Hatun’a el-yevm zimmetinde sahîhan deyni olduğunu tâyi‘an ve kat‘iyyen ikrâr u i‘tirâf etmeğin mûcebince mehr-i mu‘accel-i mezkûr altı yüz bir guruşu müdde‘iye-i mezbûre Seher Hatun’a edâ ve teslîmiyle mezbûr es-Seyyid el-Hâc Mehmed Şakir Efendi ilzâm olunduğu huzûr-ı [âlîlerine i‘lâm olundu]. fî 5 B sene [12]73.