Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 35 Hüküm no: 4 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saide Hatun’un nafaka ve mehrini ödemesi hususunda boşandığı eşi Hüseyin Ağa’ya tenbih olunması İstanbul hısnı ebvâbından Edirnekapısı dâhilinde Kasım Ağa mahâllesinde sâkine bâ‘isetü’l-i‘lâm mu‘arrefetü’z-zât Şerîfe Saide Hatun bt. el-Hâc İbrahim mahfil-i şer‘iyyâtda zevc-i mutallıkı berber esnâfından Hüseyin Ağa b. Abdullah muvâcehesinde mezbûr Hüseyin Ağa altmış bir guruş mehr-i müeccel tesmiyesiyle zevc-i dâhilim iken işbu târîh-i i‘lâm günü beni bâyinen tatlîk etmekle mezbûrun zimmetinde mütekarrir ve ma‘kūdün-aleyh mehr-i müeccel-i mezkûr altmış bir guruş ve cihet-i karzdan yirmi guruş ki cem‘an alacağım olan seksen bir guruşu hâlâ bana edâ ve teslîme ve iddetim inkızâsına değin beni infâka mezbûr Hüseyin Ağa’ya tenbîh olunmak murâdımdır deyü ba‘de’d-da‘vâ ve’l-istintâk ol dahi cevâbında kazıyye minvâl-i muharrer üzere olduğunu bi-tamâmihâ tâyi‘an ve kat‘iyyen ikrâr u i‘tirâf etmeğin mûcebince meblağ-ı mecmû‘-ı mezkûr seksen bir guruşu hâlâ ve iddeti inkızâsına değin nafaka ve kisve-bahası için bi’t-terâzî beynlerinde ta‘yîn olunan iki yüz guruşu dahi hîn-i istihkākda müdde‘iye-i mezbûre Şerîfe Saide Hatun’a edâ ve teslîme mezbûr Hüseyin Ağa’ya tenbîh olunduğu tescîl ve mübâşirleri Bâb-ı zabtiye neferâtından Zağferanborlulu Halil Ağa kulları yediyle huzûr-ı [âlîlerine i‘lâm olundu]. Fî 3 B sene [12]73.