Bab Mahkemesi 54 Numaralı Sicil (H. 1102 / M. 1691) cilt: 20, sayfa: 107 Hüküm no: 84 Orijinal metin no: [13b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Kenan’ın üzerine çocukları için nafaka takdiri Mahmiye-i İstanbul’da Neslişah Sultan mahallesinde sâkine Ayşe Hâtun bt. Mehmed nâm hâtun meclis-i şer‘-i şerîf-i enverde ve meclis-i dîn-i münîf-i ezherde, zevc-i mutallıkı bâ‘isü hâze’l-kitâb Mehmed b. Kenan mahzarında takrîr-i kelâm ve ta‘bîr-i ani’l-merâm edip, mezbûr Mehmed’in firâşından hâsıl ve benden mütevellide sadriye sagīre kızım Rukiye ve sagīr oğlum Ahmed bi hakkı’l-hidâne hacr ve terbiyemde olmağla sagīretân-ı mezbûretânın nafaka ve kisve ve sâir levâzım-ı mühimmesi için babası mezbûr Mehmed üzerine kıbel-i şer‘den kadr-i ma‘rûf nafaka farz ve takdîr olunmak matlûbumdur dedikde, hâkim-i muvakki‘-i sadr-ı kitâb -tûbâ-lehû ve hüsnü me’âb- hazretleri dahi sagīretân-ı mezbûretânın nafaka ve kisve ve sâir levâzım-ı mühimmesi için babası mezbûr Mehmed üzerine târih-i kitâbdan sagīre kızı Rukiye’ye dört akçe ve sagīr oğlu Ahmed’e dört akçe cem‘an sekiz akçe farz ve takdîr edip, meblağ-ı mefrûz-ı mezbûru sagīretân-ı mezbûretânın nafaka ve kisve ve sâir levâzım-ı mühimmesine harc ve sarfa lede’l-iktizâ istidâneye ve inde’z-zafer babası mezbûr üzerine rücû‘a mezbûre Ayşe Hâtun’a izin vermeğin, mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min şehri Cemâziyelevvel sene 1102. Şuhûdü’l-hâl: Seyyid Mehmed b. Mehmed, Mustafa Çelebi b. Mehmed, Ahmed b. Abdullah, Mehmed b. Ramazan, Ali b. Hüseyin, İbrahim Çelebi b. Ahmed.