Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 36 Hüküm no: 7 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cariye bedelinden dolayı olan borcunu ödemesi hususunda Şişman Mustafa Ağa’ya tenbihte bulunulması İstanbul’da Aksaray kurbünde Kazganî Saidi Çelebi mahâllesinde sâkine sâhibe-i arzuhâl mu‘arrefetü’z-zât Âişe Hanım bt. Halil mahfil-i şer‘iyyâtda Esirci tâifesinden derûn-ı arzuhâlde mezkûretü’l-ism Şişman Mustafa Ağa b. İsmail muvâcehesinde mezbûr Mustafa Ağa gāibetü ani’l-meclis Zenciyetü’l-asl ma‘lûmetü’l-vasf Sadakat bt. Abdullah’ı kezâlik gāibetü ani’l-meclis Maverdi Kadın bt. Abdullah’dan müşterâ yedinde mülkü olmak üzere üç bin yüz guruş semen-i medfû‘ ve makbûza bana bey‘ ve temlîk ve teslîm eylediğinde, ben dahi ber-vech-i muharrer iştirâ ve temellük ve tesellüm ve kabz ü kabûl edip gāibe-i mevsûfe-i mezbûre benim şirâen mülküm iken yedimde olup işbu târîh-i i‘lâm şehrinin beşinci günü târîhiyle müverrah mahfil-i şer‘iyyâtdan verilen işbu bir kıt‘a i‘lâm-ı şer‘î nâtık olduğu üzere gāibe-i mezbûre Sadakat Kadın ben gāibe-i mezbûre Maverdi Kadın’ın câriye-i memlûkesi iken gāibe-i merkūme Maverdi Kadın beni malından mahzar-ı şuhûdda âzâd ve i‘tâk etmekle binâen-aleyh sebîlimin tahliye olunması murâdımdır deyü huzûr-ı şer‘de bi’l-muvâcehe inkârıma mukārin da‘vâ ve müdde‘âsı şuhûd-ı udûlle ber-nehc-i şer‘î ba‘de’l-isbât ve’l-hükm şer‘an sebîli tahliye olunmağla, el-hâletü hâzihi ben dahi mezbûr Mustafa Ağa’ya medfû‘um olan semen-i mezkûr üç bin yüz guruşu mezbûr Mustafa Ağa’dan bi’l-mürâca‘a hâlâ istirdâd ederim deyü ba‘de’d-da‘vâ ve’l-istintâk, ol dahi cevâbında ben gāibe-i mevsûfe-i mezbûre Sadakat’i gāib ani’l-meclis Mehmed Ağa’dan müşterâ yedimde rıkka münkāde câriye-i memlûkem iken müdde‘iye-i mezbûre Âişe Hatun’a ancak iki bin beş yüz guruş semen-i medfû‘ ve makbûza bey‘ ü temlîk ve teslîm etmiş idim deyüb müdde‘iye-i mezbûrenin ziyâde altı yüz guruş teslîm-i semen müdde‘âsını ve mazmûn-ı i‘lâm-ı mezkûru inkâr etmekle müdde‘iye-i mezbûre Âişe Hanım ber-vech-i muharrer ziyâde meblağ-ı merkūm altı yüz guruş teslîm-i semen müdde‘âsını ve mazmûn-ı i‘lâm-ı mezkûru lede’t-tezkiye adl ve makbûlü’ş-şehâde idükleri ihbâr olunan İstanbul’da Vâlide Sultân Mektebi mu‘allim-i sıbyânı İbrahim Efendi b. Ahmed Nazif Efendi ve mîrlivâ mütekā‘idlerinden izzetlü Ahmed Paşa teba‘asından Mehmed Ağa b. Osman nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince mezbûr Mustafa Ağa’nın ikrâr u i‘tirâfı üzere lâzım gelen meblağ-ı merkūm iki bin beş yüz guruş ve ba‘de’s-sübût lâzım gelen altı yüz guruş ki meblağ-ı mecmû‘-ı merkūm üç bin yüz guruşu müdde‘iye-i mezbûre Âişe Hanım’a redd ü teslîme mezbûr Mustafa Ağa’ya tenbîh olunduğu huzûr-ı [âlîlerine i‘lâm olundu]. Fî 7 B sene [12]73.