Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 37 Hüküm no: 8 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eşya bedelinden dolayı olan borcunu ödemesi hususunda Ümmügülsüm Hatun’a tenbih olunması Postabaşı Zeyrekli Süleyman Kavvâs kaydıyla olan i‘lâm İşkodralı Süleyman’a teslîm, Derûn-ı arzuhâlde mezkûrü’l-ism Taşçı esnâfından Hasan Ağa b. Hasan ve zevcesi Kâmile Hatun bt. Mehmed mahfil-i şer‘iyyâtda İstanbul’da Yenibahçe kurbünde Karabaş mahâllesinde sâkine sâhibe-i arzuhâl mu‘arrefetü’z-zât Ümmügülsüm Hatun bt. Ali muvâcehesinde ve mezbûre Ümmügülsüm Hatun zimmetinde beher zirâ‘ı üçer guruşa olmak üzere bundan akdem müşterek malımızdan ve yedimizden iştirâ ve kabz eylediği üç yüz elli altı buçuk zirâ‘ elvan basma semeninden bi’l-ma‘iyye alacak hakkımız olan dokuz yüz altmış dokuz buçuk guruşun dört yüz seksen guruşunu mukaddemâ bize def‘ ü teslîm etmekle bâkīsi olan dört yüz seksen dokuz buçuk guruşu dahi mezbûre Ümmügülsüm Hatun’dan hâlâ taleb ederiz deyü tasaddî eylediğimiz da‘vâmızdan bâ-tavassut-ı muslihîn mezbûre Ümmügülsüm Hatun ile bi’t-tav‘ ve’r-rızâ üç yüz yirmi guruş üzerine sulh olduğumuzda, ol dahi sulh-ı mezkûru ba‘de’l-kabûl ziyâde müdde‘âmıza ve bi’l-cümle husûs-ı mezkûra müte‘allıka da‘vâdan biz mezbûre Ümmügülsüm Hatun’un zimmetini ibrâ-i âmm-ı sahîh-i şer‘î ile ibrâ ve iskāt eylediğimizde ol dahi zimmetimizde bâ-tahvîl cihet-i karzdan alacak hakkı olup kendüye seviyyen edâ ve teslîme ta‘ahhüd eylediğimiz altı yüz guruş ile bi-tarîkı’l-emâne yedimizde mahfûz malı olan bir aded basma koyun sâ‘ati ve bir aded gül yüzük ve bir aded havludan mâ‘adâ kezâlik bi’l-cümle husûs-ı mezkûra müte‘allıka da‘vâdan bizim zimmetimizi ibrâ-i âmm-ı sahîh-i şer‘î ile ibrâ ve iskāt ve tarafeynden her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr üç yüz yirmi guruşu zevcân-ı mezbûrân Hasan Ağa ve Kâmile Hatun’a bi’t-taleb edâ ve teslîme mezbûr Ümmügülsüm Hatun’a tenbîh olunduğu tescîl ve huzûr-ı [âlîlerine i‘lâm olundu]. Fî 6 B sene [12]73.