Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 38 Hüküm no: 9 Orijinal metin no: [2a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun’un Hasan Ağa’dan muhalaa usulüyle boşanması Nüsha-i sâniye Mübâşirine teslîm. İstanbul’da Samatya kurbünde Sancakdâr Hayreddin mahâllesinde sâkine bâ‘isetü’l-i‘lâm mu‘arrefetü’z-zât Fâtıma Hatun bt. Hüseyin mahfil-i şer‘iyyâtda zevc-i muhâlı‘ı bâb-ı zabtiye neferâtından Hasan Ağa b. Halil muvâcehesinde mezbûr Hasan Ağa yüz elli bir guruş mehr-i müeccel tesmiyesiyle zevc-i dâhilim olup lâkin beynimizde hüsn-i mu‘âşeretimiz olmamağla mezbûrun zimmetinde mütekarrir ve ma‘kūdün-aleyh mehr-i müeccel-i mezkûr hakkım olan yüz elli bir guruş ve bedel-i hul‘ nâmıyla zevcim mezbûra malımdan def‘ ü teslîm eylediğim yüz guruş ki cem‘an iki yüz elli bir guruş üzerlerine ve nafaka-i iddet-i mu‘ayyene-i ma‘lûmem ve meûnet-i süknâm dahi kendi üzerime olmak üzere zevcim mezbûr Hasan Ağa ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl ancak hukūk-ı zevciyete müte‘allıka da‘vâdan tarafeynden her birimiz âharın zimmetini ibrâ-i sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ikrâr ve tasdîkleri tescîl ve mübâşirleri Bâb-ı zabtiye neferâtından Karagümrüklü İsmail Ağa kulları yediyle huzûr-ı [âlîlerine i‘lâm olundu]. Fî 7 B sene 1223.