Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 39 Hüküm no: 10 Orijinal metin no: [2a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa ve Osman Ağa’nın Maltepe Kışlasının inşasındaki hizmetlerinin ücretleriyle ilgili iddialarının geçersiz olduğu Lağımcı esnâfından işbu bâ‘iseyi’l-i‘lâm Ahmed Ağa b. Mahmud ve Osman Ağa b. Hüseyin nâm kimesneler mahfil-i şer‘iyyâtda esnâf-ı merkūmeden Mehmed Ağa b. Ali muvâcehesinde biz esnâf-ı merkūmeden gāib ani’l-meclis diğer Osman Ağa b. Abdullah b. Abdurrahman’ın talebiyle Maltepe Kışlağ-ı hümâyunu ebniyesinde ücret kavlinsiz elli beş gün müddet lağımcılık etmemizle müddet-i mezkûrede ecr-i mislimiz olan yevmiye on altışar guruşdan cem‘an iktizâ eden bin altı yüz guruşun bin yüz guruşunu işbu mezbûr Mehmed Ağa bundan akdemce rızâsıyla kendi malından olarak [2b] mücerred bize edâ ve teslîm eylediğine binâen bâkīsi olan beş yüz guruş dahi bize edâ ve teslîme mezbûr Mehmed Ağa’ya cebr ve tenbîh olunmak murâdımızdır deyü takrîr-i meşrûhları üzere mezbûr Mehmed Ağa’dan tasaddî eyledikleri da‘vâları meşrû‘a ve iltifâta şâyân olmadığı kendülere tefhîm ve mûcebince da‘vâ-i mezkûreleriyle mezbûr Mehmed Ağa’ya bî-vech-i şer‘î mu‘ârazadan men‘ olundukları tescîl ve mübâşirleri Bâb-ı zabtiye neferâtından Erzincanî Mehmed Ağa kulları yediyle huzûr-ı [âlîlerine i‘lâm olundu]. Fî 5 B sene [12]73.