Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 39 Hüküm no: 11 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çiftçi İbrahim, Süleyman ve Mehmed’in Rami Çiftliğindeki hizmetlerinden dolayı ücret taleplerinin haksız olduğu Rençber tâifesinden İbrahim b. İskender ve Süleyman b. el-Hâc İsmail ve Mehmed b. Ahmed nâm kimesneler mahfil-i şer‘iyyâtda Kayseriye ahâlîsinden ve lağımcı esnâfından bâ‘isü’l-i‘lâm diğer Mehmed Ağa b. Ahmed muvâcehesinde biz işbu târîh-i i‘lâmdan iki ay mukaddem mezbûr diğer Mehmed Ağa’nın talebiyle ücret kavlinsiz İstanbul’da Rami Çiftliği Kışlağ-ı hümâyûnu’nda yüz yirmi bir gün müddet rençberlik edip müddet-i mezkûrede ecr-i mislimiz olan yevmiye on altışar guruşdan cem‘an bin dokuz yüz otuz altı guruşun bin üç yüz otuz bir guruşunu mezbûr diğer Mehmed Ağa yedinden kabz ü istîfâ etmemizle bâkīsi olan altı yüz beş guruşu dahi bize edâ ve teslîme mezbûr diğer Mehmed Ağa’ya tenbîh olunmak murâdımızdır deyü ba‘de’d-da‘vâ ve’l-istintâk, ol dahi cevâbında ben müdde‘ûn-ı merkūmûn ile İstanbul’da Fatih Sultân Mehmed Han -aleyhi’r-rahmetü ve’l-gufrân- hazretleri câmi‘-i şerîfi civârında Karaman-ı kebîr nâm mahâlde vâki‘ sâkin olduğum han odasında yevmiye on birer guruş ücret tesmiye ederek ebniye-i mezkûrede ol mikdâr müddet rençberlik etdirip müddet-i mezkûrede ecr-i müsemmâ-yı mezkûrları olan meblağ-ı mezkûr bin üç yüz otuz bir guruşu dahi kabzlarını mukırr u mu‘terif oldukları vechile kendülere tamâmen def‘ ü teslîm eylediğimde onlar dahi yedimden ahz ü kabz ve istîfâ-yı hak etmişlerdir deyü müdde‘ûn-ı merkūmûnun inkârlarına mukārin eylediği def‘ini her biri mahâllerinden lede’t-tezkiye adl ve makbûlü’ş-şehâde idükleri ihbâr olunan esnâf-ı merkūmeden Ali b. Ahmed ve Hasan b. İbrahim nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘ûn-ı mezbûrûn İbrahim ve Süleyman ve Mehmed ziyâde da‘vâ-i mezkûreleriyle mezbûr diğer Mehmed Ağa’ya bî-vech-i şer‘î mu‘ârazadan men‘ olundukları tescîl ve mübâşirleri Bâb-ı zabtiye neferâtından Erzincanî Mehmed Ağa kulları yediyle huzûr-ı [âlîlerine i‘lâm olundu]. Fî 4 B sene [12]73.