Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 40 Hüküm no: 12 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’ya olan borcunu ödemesi hususunda Safranbolu Naibi Mustafa Hulusi Efendi’ye tenbih olunması Ma‘rûz, Sâhib-i arzuhâl İstanbul Bezzâzistânlı el-Hâc Mustafa Ağa b. el-Hâc Ahmed mahfil-i şer‘iyyâtda sâbıkā Zağferanborlu kazâsı nâibi eşrâf-ı kuzât-ı kirâmdan ve derûn-ı arzuhâlde mezkûrü’l-ism Mustafa Hulusi Efendi b. Hasan muvâcehesinde mezbûr Mustafa Hulusi Efendi bin iki yüz altmış dört senesi Recebi’l-ferdi gurresinde Âsitâne-i aliyye’den kazâ-i mezkûra bi’n-niyâbe azîmeti esnâsında beni kendüye kapıkethüdâsı nasb ve ta‘yîn edip, ben dahi ba‘de’l-kabûl efendi-i mezbûrun bi-şarti’r-rücû‘ emriyle umûr-ı lâzıme-i ma‘lûmesine müddet-i ma‘lûmede malımdan bâ-defter-i müfredât vukū‘ bulan bi’l-cümle medfû‘ât ve masrûfâtım ile nakden ve havâleten makbûzâtımın hesâbını ben efendi-i mezbûr ile Dersa‘âdet’e geldikden sonra sehv ü galatdan ârî yegân yegân rü’yet eylediğimde benim efendi-i mezbûr zimmetinde lede’l-muhâsebe gayr-ı ez teslîmât sahhü’l-bâkī on iki bin doksan üç guruş alacak hakkım zuhûr etdikde ol dahi hesâb-ı mezkûr sahîhan rü’yet olunarak meblağ-ı bâkī-i mezkûr on iki bin doksan üç guruş ba‘de’l-muhâsebe bana zimmetinde sahîhan deyni olduğunu ikrâr u i‘tirâf etmiş idi. El-hâletü hâzihi meblağ-ı bâkī-i mezkûr on iki bin doksan üç guruşu mezbûr Mustafa Hulusi Efendi’den hâlâ taleb ederim deyü tasaddî eylediğim da‘vâmdan mezbûr Mustafa Hulusi Efendi ile an-inkâr kat‘â li’n-nizâ‘ iki bin beş yüz guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûr iki bin beş yüz guruşdan mâ‘adâ ziyâde müdde‘âma ve bi’l-cümle husûs-ı mezkûra müte‘allıka da‘vâdan ben mezbûr Mustafa Hulusi Efendi’nin zimmetini ibrâ ve iskāt eylediğimde ol dahi kezâlik husûs-ı mezkûra müte‘allıka da‘vâdan benim zimmetimi ibrâ ve iskāt edip ve tarafeynden her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstağnî bedel-i sulh-ı mezkûr iki bin beş yüz guruşu müdde‘î-i mezbûr el-Hâc Mustafa Ağa’ya edâ ve teslîme mezbûr Mustafa Hulusi Efendi’ye tenbîh olunduğu tescîl ve huzûr-ı [âlîlerine i‘lâm olundu]. Fî 10 B sene [12]73.