Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 41 Hüküm no: 13 Orijinal metin no: [2b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Tahir ve Kigor’un Kaptan Hasan aleyhindeki alacak iddialarından vazgeçmeleri Nüsha-i sâniye Ma‘rûz, Vilâyet-i Rumeli’de Tekfurdağı ahâlîsinden ve mellâh tâifesinden sâhib-i arzuhâl Mehmed Tahir b. Mehmed nâm kimesne Devlet-i aliyye teba‘asından ve yine sâlifü’z-zikr Tekfurdağı ahâlîsinden ve Ermeni milletinden Kigork v. Kigor hâzır olduğu hâlde mahfil-i şer‘iyyâtda tüccâr sefâini kapudanlarından derûn-ı arzuhâlde mezkûrü’l-ism Tekfurdağlı el-Hâc Hasan Kapudan b. İsmail muvâcehesinde biz bundan akdem mezbûr el-Hâc Hasan Kapudan’ın râkib olduğu sefînesinde mellâh tâifesinden iken mezbûr el-Hâc Hasan Kapudan zimmetinde ücret-i mellâhiyeden lede’l-muhâsebe gayrı-ez teslîmât sahhü’l-bâkī alacak hakkımız olan dörder yüz guruşdan cem‘an sekiz yüz guruşu mezbûr el-Hâc Hasan Kapudandan hâlâ taleb ederim deyü hâzır-ı merkūm ile ma‘an tasaddî eylediğimiz da‘vâmızdan rızâmızla meccânen fâriğler olmamızla mutâlebesine ve bi’l-cümle husûs-ı mezkûra müte‘allıka da‘vâdan biz mezbûr el-Hâc Hasan Kapudan’ın zimmetini ibrâ-i sahîh-i şer‘î ile ibrâ ve iskāt eylediğimizde ol dahi bizden iddi‘âsı olup bizim münkir olduğumuz on beş keyl-i İstanbul şa‘îr da‘vâsından rızâsıyla meccânen fâriğ olup kezâlik mutâlebesine ve bi’l-cümle husûs-ı mezkûra müte‘allıka da‘vâdan bizim zimmetimizi ibrâ-i sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü mukırrân-ı müdde‘iyân-ı merkūmân Mehmed Tahir ve Kigork’dan her birinin sâdır olan bi’l-cümle takrîr-i meşrûhlarını mezbûr el-Hâc Hasan Kapudan tasdîk ve tahkīk eylediği tescîl ve huzûr-ı [âlîlerine i‘lâm olundu]. Fî 11 B sene [12]73. Akif.