Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 41 Hüküm no: 14 Orijinal metin no: [2b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenci İbrahim’in Zenci Selim aleyhindeki hırsızlık iddiasını ispat edememesi Balyacı? esnâfından Zenci el-Hâc İbrahim b. Mehmed nâm kimesne mahfil-i şer‘iyyâtda yine esnâf-ı merkūmeden bâ‘isü’l-i‘lâm Zenci el-Hâc Selim b. Abdullah muvâcehesinde mezbûr el-Hâc Selim işbu târîh-i i‘lâmdan dört ay mukaddem İstanbul’da Avrat [3a] pazarı kurbünde Hobyar mahâllesinde vâki‘ sâkin olduğum menzile nehâren ve hufyeten duhûl ve bir çekmece derûnunda mevcûde malımdan eyâdî-i nâsda nakid hükmünde mütedâvil kavâim-i nakdiye-i ma‘lûme olarak sekiz yüz elli guruşumu fuzûlî ve bi-gayrı hakkın ahz ü kabz etmekle me’hûzum olan meblağ-ı merkūm sekiz yüz elli guruşu bana redd ü teslîme mezbûr el-Hâc Selim’e tenbîh olunmak murâdımdır deyü mezbûr el-Hâc Selim’in yedinde olup şehr-i sâbık Cumâdelâhiresi’nin on sekizinci günü târîhiyle müverraha ve hâlâ İstanbul’da Mahmudpaşa Mahkemesi nâibi bulunan mevâlî-i izâmdan fazîletlü es-Seyyid Mustafa Münib Efendi’nin hatemini hâvî işbu bir kıt‘a i‘lâm-ı şer‘î mûcebince mezbûr el-Hâc Selim’den mahkeme-i mezbûrede huzûr-ı şer‘-i şerîfde inkârına mukārin da‘vâ ve müdde‘âmı isbâtdan izhâr-ı acz edip tâlib-i tahlîf dahi olmamamla mûcebiyle ben da‘vâ-i mezkûremde mezbûr el-Hâc Selim’e bilâ-beyyine mu‘ârazadan men‘ olunmuş idim. El-hâletü hâzihi ben şâhidlerime zafer isbât için şâhidlerime zafer bulmamla ba‘de’s-sübût meblağ-ı mezkûr sekiz yüz elli guruşu bana redd ü teslîme mezbûr el-Hâc Selim’e tenbîh olunmak matlûbumdur deyü ba‘de’d-da‘vâ ve’l-inkâr müdde‘î-i merkūm el-Hâc İbrahim ber-vech-i muharrer müdde‘âsını isbât için huzûr-ı şer‘-i âlîye ikāme eylediği iki nefer kimesneler edâ-yı şehâdet-i şer‘iyye edemeyip şâhid-i âdil-i âhar ikāmesinden dahi izhâr-ı acz edip talebiyle mezbûr el-Hâc Selim bi’l-muvâcehe ber-nehc-i şer‘î tahlîf olunmağın mûcebince müdde‘î-i mezbûr el-Hâc İbrahim yine da‘vâ-i mezkûresiyle mezbûr el-Hâc Selim’e ke’l-evvel bilâ-beyyine mu‘ârazadan men‘ olunduğu tescîl ve mübâşirleri Bâb-ı zabtiye neferâtından Mahmud Ağa kulları yediyle huzûr-ı [âlîlerine i‘lâm olundu]. Fî 15 B sene [12]73.