Bab Mahkemesi 54 Numaralı Sicil (H. 1102 / M. 1691) cilt: 20, sayfa: 108 Hüküm no: 85 Orijinal metin no: [13b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Musa b. Hacı Ali’nin Ahmed Ağa b. Hacı Mustafa’ya borcunu ödemesi Mahmiye-i İstanbul’da Şeyh Vefa mahallesinde sâkin işbu bâ‘isü’l-kitâb umdetü’l-eşbâh Ahmed Ağa b. el-Hâc Mustafa meclis-i şer‘-i şerîf-i enverde, vilâyet-i Anadolu’da Beypazarı sükkânından el-Hâc Musa b. el-Hâc Ali nâm kimesne mahzarında üzerine da‘vâ ve takrîr-i kelâm edip, mezbûr el-Hâc Musa yine Beypazarı sükkânından olup, hâlâ gaybet eden Zülfikar b. Zülfikar nâm kimesneyi üzerime taslît edip, mukaddemâ Beypazarı Voyvodası Hasan Ağa’nın havâlesi ile Beypazarı kazâsı ahâlîsinden dört yüz otuz dört guruş ahz u kabz eyledin, mezbûr Zülfikar ahâlî-i vilâyetin cümlesi taraflarından vekîldir deyu tahvîf-i vech-i şer‘î üzre isbât-ı müdde‘â etmeksizin yirmi beş guruş kıymetli bir baş Bârgir ile nakid yetmiş beş guruşumu ahz u kabz etmekle, husûs-ı mezbûru mezkûr el-Hâc Musa’dan da‘vâ ve müdde‘âmı muvâcehesinde udûlle şer‘an isbât dahi etmeğin, yine bana red ve teslîmden imtinâ‘ eder, suâl olunup aynî mevcûd olan mârru’z-zikr Bârgir ile meblağ-ı mezbûr yetmiş beş guruşu red ve teslîme tenbîh olunmak matlûbumdur dedikde, gıbbe’s-suâl mezbûr el-Hâc Musa cevâbında, fi’l-hakīka hâl bâlâda şerh ve beyân ve tafsîl ve a‘yân olunan minvâl üzre olup, mârru’z-zikr Bârgir yedinde mevcûd olmağla Bârgir-i mezkûr ile meblağ-ı mezbûr yetmiş beş guruşu müdde‘î-i mezbûra red ve teslîme ba‘de’t-tenbîh, mezbûr el-Hâc Musa zikr olunan Bârgir ile meblağ-ı mezbûr yetmiş beş guruşu merkūm Ahmed Ağa’ya red ve teslîm, ol dahi ahz u kabz etmeğin, işbu vesîka bi’t-taleb [ketb] olundu. Fi’s-sâlis ve’l-ışrîn min Cemâziyelevvel li sene isneteyn ve mi’e ve elf. Şuhûdü’l-hâl: Mehmed Efendi b. Mustafa, Mübâşir Ali Çavuş b. Resul, es-Seyyid Mehmed Çelebi b. Mustafa, es-Seyyid İsâ b. Mansur Efendi, Yahya Efendi b. Ahmed, el-Hâc Mustafa Ağa b. Davud.