Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 42 Hüküm no: 15 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe Gülizar Hatun’un varisi Mevhibe Hatun’un Ayşe Sıdıka Hatun aleyhindeki eşya davasında anlaşma sağlanması Ma‘rûz, İstanbul’da Lâleli Câmi‘-i şerîfi civârında Çakırağa nâm-ı diğer Mercimek mahâllesinde sâkin iken işbu târîhden üç sene mukaddem vefât eden Âişe nâm-ı diğer Gülizar Hatun bt. Abdullah’ın sulbiye kebîre kerîmesi ve hasran vârisesi sâhibe-i arzuhâl mu‘arrefetü’z-zât Mevhibe Hatun bt. Ahmed bi’t-terâzî mahfil-i şer‘iyyâtda derûn-ı arzuhâlde mezkûretü’l-ism kezâlik mu‘arrefetü’z-zât Âişe Sıdıka Hatun bt. Süleyman muvâcehesinde vâlidem ve mûrisem müteveffât-ı mezbûrenin hîn-i vefâtında hâric-ez hüccet-i şer‘iyye terekesi olup ancak bana mevrûs olan mecmû‘u otuz bin yüz elli guruş kıymetli iki aded elmaslıca iğne ve bir altın koyun sâ‘ati ve bir re’s bargir ve bir aded araba ve dört aded kazmir ve şalâkî ferâce ve bir aded elma kürk ve bir aded samur kürk ve bir aded teyin kürk ve yarım zirâ‘ Lahor şal ve yirmi beş aded kutnî ve kumaş ve canfes anteri ma‘a şalvar ve altı aded sandalye ve bir aded kanepe? ve otuz vakiye evân-ı nühâsiye-i ma‘lûme ve kıtık memlû beşer aded basma yasdık ve iki basma mak‘ad ve iki aded yün memlû minder ve beş aded yazma yorgan ve üç aded yüz yasdığı ve üç aded baş yasdığı ve beş aded dokuma çarşeb ve beş aded döşek çarşebi ve bir aded kebîr kaliçe ve bir aded orta keçesi ve bir aded nühâs mangal ma‘a tahta ve bir aded leğen ma‘a ibrik ile yedi bin beş yüz nakdini merkūme Âişe Sıdıka Hatun fuzûlî ve bi-gayrı hakkın hufyeten ahz ü kabz ve ketm ü ihfâ etmekle suâl olunup huliyyât ve eşyâ-yı muharrere-i mezkûre mevcûde ise aynlarını ve müstehleke ise ba‘de’s-sübût kıymetleri olan meblağ-ı merkūm otuz bin altı yüz elli guruş ve nakd-i merkūm yedi bin guruş ki cem‘an otuz sekiz bin yüz elli guruşu merkūme Âişe Sıdıka Hatun’dan bi’l-verâse damânen taleb ederim deyü tasaddî eylediğim da‘vâmdan bâ-tavassut-ı muslihîn mezbûre Âişe Sıdıka Hatun ile an-inkâr kat‘â li’n-nizâ‘ bin elli guruş üzerine bi’t-terâzî ba‘de-akdi’l-musâlaha ve’l-kabûl bedel-i sulh-ı mezkûr bin elli guruşu işbu meclis-i şer‘de bana tamâmen def‘ ü teslîm eylediğinde ben dahi yedinden bi’t-tamâm ve’l-kemâl ahz ü kabz etmemle ziyâde müdde‘âma ve bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i da‘vâdan ben merkūme Âişe Sıdıka Hatun’un zimmetini, ol dahi müteveffât-ı merkūme Âişe nâm-ı [diğer] Gülizar Hatun zimmetinde bâ-hüccet-i şer‘iyye karzdan alacak hakkı olan beş bin guruşdan rızâsıyla meccânen fâriğā olup mutâlebesine ve bi’l-cümle husûs-ı merkūma ve kezâlik işbu târîh-i i‘lâma gelince sâir cemî‘ hukūk-ı şer‘iyyeye müte‘allıka da‘vâdan benim zimmetimi tarafeynden her birimiz ibrâ-i âmm-ı sahîh-i şer‘î ile kabûlümüzü hâvî ibrâ ve iskāt eylediğimizden sonra ben merkūm Âişe Sıdıka Hatun’a malımdan işbu meclis-i şer‘de bin elli guruş iktirâz ve teslîm eylediğimde ol dahi yedimden iktirâz ve kabz ve umûruna sarfla istihlâk edip meblağ-ı mezkûr bin elli guruşu dahi çend rûz zarfında bana edâ ve teslîme ta‘ahhüd eyledi deyü mukırra-i merkūme Mevhibe Hatun’un sâdır olan bi’l-cümle takrîr-i meşrûhunu mezbûre Âişe Sıdıka Hatun tasdîk ve tahkīk eylediği tescîl ve huzûr-ı [âlîlerine i‘lâm olundu]. Fî 10 B sene [12]73.