Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 43 Hüküm no: 16 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa’nın varislerinden kızı Ayşe Hatun’un diğer varis İbrahim Sadeddin’in zimmetini ibra etmesi Ma‘rûz, İstanbul hısnı ebvâbından Kumkapı dâhilinde Muhsine Hatun mahâllesinde sâkin iken bundan akdem vefât eden haffâf esnâfından es-Seyyid Mustafa Ağa b. es-Seyyid Ahmed b. Abdullah’ın verâseti zevce-i menkûha-i metrûkesi Âişe Hatun bt. Ahmed ile müteveffât zevcesi Tevhîde Hatun’dan mütevellidler sulbî kebîr oğlu İbrahim Sadeddin Efendi ve sulbiye kebîre kerîmesi diğer Âişe Hatun’a münhasıra ve tashîh-i mesele-i mîrâsları yirmi dört sehmden olup sihâm-ı mezbûreden üç sehmi zevcesi mezbûreye ve on dört sehmi oğlu mezbûra ve yedi sehmi dahi kızı mezbûreye isâbeti tahakkukundan sonra verese-i mezbûrûndan sâhibe-i arzuhâl mu‘arrefetü’z-zât mezbûre diğer Âişe Hatun bi’t-terâzî mahfil-i şer‘iyyâtda derûn-ı arzuhâlde mezkûretü’l-ism mezbûr İbrahim Sadeddin Efendi muvâcehesinde pederimiz ve mûrisimiz müteveffâ-yı mezbûr es-Seyyid Mustafa Ağa’nın hîn-i vefâtında Kısmet-i askeriye mahkemesi tarafından ma‘rifet-i şer‘le tahrîr ve âhara bey‘ olunup ba‘de-ihrâci’l-masârıfi’l-lâzıme sahhü’l-bâkī esmân-ı hâsılası olan yirmi bir bin altı yüz yirmi guruş otuz paranın altı bin üç yüz yetmiş guruşunu ben babam ve mûrisimiz müteveffâ-yı mezbûr es-Seyyid Mustafa Ağa zimmetinde cihet-i karzdan müsbet ve mahkûmün-bih alacak hakkım olan altı bin üç yüz yetmiş guruşa mahsûben bi-hakkın ahz ü kabz edip bâkīsi olan on beş bin iki yüz elli guruşun yedi bin dört yüz altmış beş guruşunu dahi karındaşım mezbûr es-Seyyid İbrahim Sadeddin Efendi babamız ve mûrisimiz müteveffâ-yı mezbûr zimmetinde cihet-i karzdan kezâlik müsbet ve mahkûmün-bih alacak hakkı olan yedi bin dört yüz altmış beş guruşa mahsûben ahz ü kabz ve istîfâ-yı hak etdikden sonra mâ‘adâsı olan yedi bin yedi yüz seksen beş guruş otuz para dahi sâir ashâb-ı hukūk beynlerinde tevzî‘ ve taksîm olunarak ber-mantûk-ı defter-i kassâm istîfâ-yı hak etmeleriyle el-hâletü hâzihi babamız ve mûrisimiz müteveffâ-yı mezbûrun dâhil-i defter-i kassâm-ı mezkûr ve hâric-ez-defter-i kassâm kalîl ü kesîr, celîl ü hakīr, nukūd ve urûz, ma‘lûm ve mechûl ismi mâl ıtlâk olunur terekesine ve hukūk-ı mîrâsına müte‘allıka âmme-i de‘âvîden ben karındaşım mezbûr es-Seyyid İbrahim Sadeddin Efendi’nin zimmetini, ol dahi kezâlik babamız ve mûrisimiz müteveffâ-yı mezbûrun dâhil-i defter-i kassâm-ı mezkûr ve hâric-ez-defter-i kassâm kalîl ü kesîr, celîl ü hakīr, nukūd ve urûz, ma‘lûm ve mechûl ismi mâl ıtlâk olunur terekesine ve hukūk-ı mîrâsa müte‘allıka âmme-i de‘âvîden [3b] benim zimmetimi tarafeynden her birimiz ibrâ-i âmm-ı sahîh-i şer‘î ile kabûlümüzü hâvî ibrâ ve iskāt eyledik deyü tarafeynin ikrâr ve tasdîkleri tescîl ve huzûr-ı [âlîlerine i‘lâm olundu.] Fî 3 B sene [12]73. Ser-ketebe.