Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 44 Hüküm no: 17 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fırıncı tablakârı Reşid’in Karanlık Fırın Ustası İsail aleyhindeki alacak iddiasından men olunması İstanbul’da Karagümrük nâm mahâlde ekmekçi fırınında ekmekçi tablakârı Reşid b. Rüstem nâm kimesne mahfil-i şer‘iyyâtda teba‘a-i Devlet-i aliyye’den ve Rum milletinden olup mahrûse-i Galata’da Karanlık Fırın demekle ma‘rûf ekmekçi fırını ustası olan bâ‘isü’l-i‘lâm İsail v. İsak muvâcehesinde ben merkūm İsail ile beher şehr yüz altmışar guruş ücret tesmiyesiyle mârrü’z-zikr Karanlık Fırın’da merkūm İsail’e ber-mu‘tâd yedi buçuk ay tablakârlık ile hizmet ve ba‘dehâ müfârakat etmemle ecr-i mesâ‘î-i mezkûremden müddet-i merkūmede merkūm İsail zimmetinde müctemi‘ alacak hakkım olan cem‘an bin iki yüz yetmiş beş guruşun dokuz yüz on beş guruşunu merkūm İsail’den bundan akdemce ahz ü kabz etmemle bâkīsi olan üç yüz altmış guruşu dahi merkūm İsail’den hâlâ taleb ederim deyü ba‘de’d-da‘vâ ve’l-istintâk ol dahi cevâbında inkâr etmekle müdde‘î-i mezbûr Reşid ber-minvâl-i muharrer müdde‘âsını isbâtdan izhâr-ı acz edip talebiyle merkūm İsail’e bi’l-muvâcehe ber-nehc-i şer‘î yemîn verilmeğin mûcebince müdde‘î-i mezbûr Reşid da‘vâ-i mezkûresiyle merkūm İsail’e bilâ-beyyine mu‘ârazadan men‘ olunduğu tescîl ve mübâşirleri Bâb-ı zabtiye neferâtından Ohrili Mahmud Ağa kulları yediyle huzûr-ı [âlîlerine i‘lâm olundu]. Fî 9 B sene [12]73. Arif.