Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 45 Hüküm no: 18 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’a olan borcunu ödemesi hususunda eski eşi İbrahim Edhem Ağa’ya tenbihte bulunulması Ma‘rûz, İstanbul’da Atpazarı kurbünde Manisalı Mehmed Paşa mahâllesinde sâkine mu‘arrefetü’z-zât Hadîce bt. Ali nâm hatun mahfil-i şer‘iyyâtda zevc-i sâbıkı Muhallebici esnâfından İbrahim Edhem Ağa b. Ali nâm kimesne muvâcehesinde mezbûr İbrahim Edhem Ağa ile mukaddemâ zevciyet beynimizde kāime iken ben mezbûr İbrahim Edhem Ağa’nın bi-şarti’r-rücû‘ emriyle kendi umûr-ı lâzıme-i ma‘lûmeme malımdan bâ-defter-i müfredât kadr-ı ma‘rûf harc ü sarf eylediğim beş yüz otuz beş guruşu mezbûr İbrahim Edhem Ağa’dan bi’l-mürâca‘a hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr İbrahim Edhem Ağa ile bi’t-tav‘ ve’r-rızâ iki yüz elli guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allıka da‘vâdan ben mezbûr İbrahim Edhem Ağa’nın zimmetini ibrâ-i sahîh-i şer‘î ile ibrâ ve iskāt eylediğimde ol dahi kezâlik husûs-ı merkūma müte‘allıka da‘vâdan benim zimmetimi ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki yüz elli guruşu müdde‘iye-i mezbûre Hadîce Hatun’a bi’t-taleb hâlâ edâ ve teslîme mezbûr İbrahim Edhem Ağa’ya tenbîh olunduğu mübâşirleri Bâb-ı zabtiye neferâtından Tophaneli Hasan Ağa kulları yediyle huzûr-ı [âlîlerine i‘lâm olundu]. Fî 17 B sene [12]73.