Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 46 Hüküm no: 19 Orijinal metin no: [3b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın, kefaletten dolayı Yahudi İsayel’de olan alacağını tahsil etmesi Hademeden Salih Ağa kaydıyla Eğrikapılı Ahmed Çavuş’a teslîm, Ma‘rûz, İstanbul’da Edirnekapısı dâhilinde Çakırağa mahâllesinde sâkin Dîvân-ı de‘âvî Çavuşluğu’ndan muhrec sâhib-i arzuhâl Ali Ağa b. İbrahim nâm kimesne mahfil-i şer‘iyyâtda derûn-ı arzuhâlde mastûrü’l-ism teba‘a-i Devlet-i aliyye’den İsayel Yahûdî muvâcehesinde benim merkūm İsayel Yahûdînin babası gāib ani’l-meclis Salamon v. İsayel v. Adam nâm Yahûdî zimmetinde cihet-i karzdan alacak hakkım olan üç bin beş yüz guruşa oğlu işbu merkūm İsayel tarafeynden bi’l-emr ve’l-kabûl kefâlet-i mutlakā-i sahîha-i şer‘iyye ile kefil ve zâmin olmağla el-hâletü hâzihi meblağ-ı mekfûlün-bih-i mezkûr üç bin beş yüz guruşu kefâlet-i mahkiyesine binâen merkūm İsayel Yahûdîden hâlâ taleb ederim deyü tasaddî eylediğim da‘vâmdan bâ-tavassut-ı muslihîn merkūm İsayel Yahûdî ile an inkâr kat‘â li’n-nizâ‘ beş yüz guruş üzerine bi’t-terâzî ba‘de-akdi’l-musâlaha ve’l-kabûl bedel-i sulh-ı mezkûr beş yüz guruşu merkūm İsayel işbu meclis-i şer‘de bana def‘ ü teslîm eylediğinde ben dahi yedinden bi’t-tamâm ve’l-kemâl ahz ü kabz etmemle ziyâde müdde‘âma ve bi’l-cümle husûs-ı merkūma müte‘allıka da‘vâdan tarafeynden her birimiz âharın zimmetini ibrâ-i sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü mukırr-ı mezbûr Ali Ağa’nın bi’l-cümle takrîr-i meşrûhunu merkūm İsayel Yahûdî tasdîk ve tahkīk eylediği tescîl ve huzûr-ı [âlîlerine i‘lâm olundu]. Fî 20 B sene [12]73. el-Hâc İbrahim.