Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 46 Hüküm no: 20 Orijinal metin no: [3b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakızlı Dimitri’nin Arnavut Bülbül aleyhindeki alacak talebinden men olunması Ma‘rûz, Devlet-i Aliyye teba‘asından ve bahçıvan tâifesinden Sakızlı Dimitri v. Todori mahfil-i şer‘iyyâtda İstanbul’da Taşkasap civârında Yusuf Paşa Çeşmesi kurbünde vâki‘ ekmekçi fırınında sâkin yine Devlet-i aliyye teba‘asından ve habbâz esnâfından bâ‘isü’l-i‘lâm Arnavud Bülbül v. Tanaş muvâcehesinde ben işbu târîh-i i‘lâmdan altı sene mukaddem merkūm Bülbül’ün malından ve yedinden ceste ceste iştirâ ve kabz eylediğim ma‘lûmü’l-vezn ve’l-fiât nân-ı azîz semeninden merkūm Bülbül’e ceste ceste def‘ ü teslîm eylediğimde, ol dahi yedimden tamâmen ve kâmilen ahz ü kabz etmiş iken malımdan ziyâde ceste ceste cem‘an iki yüz yirmi sekiz guruşumu dahi fuzûlî ve bi-gayrı hakkın ahz ü kabz ve istihlâk etmekle ol vechile merkūm Bülbül zimmetinde bi-tarîkı’d-damân alacak hakkım olan meblağ-ı merkūm iki yüz yirmi guruşu merkūm Bülbül’den hâlâ istirdâd ederim deyü ba‘de’d-da‘vâ ve’l-inkâr müdde‘î-i merkūm Dimitri ber-minvâl-i muharrer müdde‘âsını isbâtdan izhâr-ı acz birle istihlâf etdikde merkūm Bülbül’e bi’l-muvâcehe ber-nehc-i şer‘î yemîn verilmeğin mûcebince müdde‘î-i merkūm Dimitri da‘vâ-i mezkûresiyle merkūm Bülbül’e bilâ-beyyine mu‘ârazadan men‘ olunduğu mübâşirleri Bâb-ı zabtiye neferâtından Mahmudpaşalı Mustafa Ağa kulları yediyle huzûr-ı [âlîlerine i‘lâm olundu]. Fî-gurreti B sene [12]73.