Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 47 Hüküm no: 21 Orijinal metin no: [3b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mustafa’nın, Dimitri’de olan alacağını kardeşi Yorgi’den istemesinin meşru olmadığı Mübâşirine teslîm Vilâyet-i Anadolu’da Harput sancağına tâbi‘ Divriğ kazâsı ahâlîsinden ve Dersa‘âdet’de arpacı esnâfından es-Seyyid Hüseyin b. es-Seyyid Mustafa mahfil-i şer‘iyyâtda Devlet-i aliyye teba‘asından ve bakkāl tâifesinden Yorgi v. Karalı muvâcehesinde benim işbu merkūmun li-ebeveyn er karındaşı gāib ani’l-meclis bakkāl Dimitri zimmetinde elli altı keyl-i İstanbulî şa‘îr semeninden gayrı-ez teslîmât sahhü’l-bâkī alacak hakkım olan bin yüz kırk guruşun bin kırk guruşunu medyûnum gāib-i merkūm bundan akdem ceste ceste bana edâ ve teslîm edip bâkīsi olan yüz guruşu el-an bana vermediğine ve işbu merkūm Yorgi dahi mücerred medyûnum gāib-i merkūmun li-ebeveyn er karındaşı olduğuna binâen meblağ-ı bâkī-i merkūm yüz guruşu bana kendi malından vermek üzere işbu merkūm Yorgi’ye cebr ve tenbîh olunmak murâdımdır deyü takrîr-i meşrûhu üzere merkūm Yorgi’den tasaddî eylediği da‘vâsı meşrû‘a ve iltifâta şâyân olmadığı kendüye tefhîm ve mûcebince da‘vâ-i mezkûresiyle merkūm Yorgi’ye bî-vech-i şer‘î mu‘ârazadan men‘ olunduğu ve mübâşirleri Bâb-ı zabtiye neferâtından Eyüblü Ahmed Ağa kulları yediyle huzûr-ı [âlîlerine i‘lâm olundu]. Fî 12 B sene [12]73. Mehmed Emin.