Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 47 Hüküm no: 22 Orijinal metin no: [3b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirneli Hatice Hanım’ın eşi Mehmed Murad Ağa’dan muhalaa usulüyle boşanması Ma‘rûz, İstanbul’da Ebulfeth Gāzî Sultân Mehmed Han -aleyhi’r-rahmetü ve’l-gufrân- hazretleri câmi‘-i şerîfi civârında Kumrulu Mescid nâm-ı diğer Mimarsinan mahâllesinde müsâfereten sâkine sâhibe-i arzuhâl mu‘arrefetü’z-zât Edirneli Hadîce Hatun bt. Ahmed mahfil-i şer‘iyyâtda zevc-i muhâlı‘ı derûn-ı arzuhâlde mezkûrü’l-ism Edirneli Mehmed Murad Ağa b. Mehmed muvâcehesinde mezbûr Mehmed Murad Ağa dört yüz elli bir guruş mehr-i müeccel tesmiyesiyle zevc-i dâhilim olup [4a] lâkin beynimizde hüsn-i mu‘âşeretimiz olmamağla zimmetinde mütekarrir ve ma‘kūdün-aleyh mehr-i müeccel-i mezkûr hakkım olan dört yüz elli bir guruş ile nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere ve mezbûr Mehmed Murad Ağa’nın firâşından hâsıla ve benden mütevellide sulbiye kızı işbu hâzıratü bi’l-meclis tahmînen yedi yaşında Safiye nâm sagīreyi dahi dokuz yaşını tekmîl edip hıdâneden sâkıta oluncaya değin kendi malımdan infâk ve iksâ edip eğer tamâm-ı müddetde fevt olur ise nafaka-i bâkiyesinden zimmetim beriye olmak üzere zevcim mezbûr Mehmed Murad Ağa ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyete ve ibtidâ-yı zevciyetimizden işbu târîh-i i‘lâma gelince sâir cemî‘ hukūk-ı şer‘iyyeye müte‘allıka âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu]. Fî 25 B sene [12]73.