Bab Mahkemesi 54 Numaralı Sicil (H. 1102 / M. 1691) cilt: 20, sayfa: 109 Hüküm no: 86 Orijinal metin no: [13b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Resul b. Tayyib’in emlâk ve arazisini Ali Bey b. Osman’a satması Vilâyet-i Anadolu’da Kastamonu sancağında Daday kazâsına tâbi‘ Eşen nâm karye ahâlîsinden olup mahmiye-i İstanbul’da Şeyh Ebülvefâ kurbunda sâkin Resul b. Tayyib nâm kimesne meclis-i şer‘-i şerîf-i enverde, bâ‘isü hâze’l-kitâb Ali Bey b. Osman nâm kimesne mahzarında ikrâr ve takrîr-i kelâm edip, silk-i mülkümde münselik olup, karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd menzil arsasını ve havuz yeri ve eşcâr-ı müsmire ve gayri müsmireyi hâvî bahçe-i kübrâ bi safkatin vâhidetin mezbûr mülkü bana beş guruşa bey‘-i bâtt-ı sahîh-i şer‘î ile bey‘, ol dahi vech-i muharrer üzre iştirâ ve kabûl edip, yine karye-i mezbûrede vâki‘ ma‘lûmü’l-hudûdi’l-kat‘ tarlalarımın dahi hakk-ı tefvîzini yirmi guruş bedel mukābelesinde sâhib-i arz ma‘rifetiyle mezbûr Ali Bey’e tefvîz, ol dahi tefevvüz ve kabûl ettiğinden sonra semen-i mezbûr ile bedel-i merkūm cem‘an yirmi beş esedî guruşu mezkûr Ali Bey yedinden tamâmen ahz u kabz edip, emlâk-i mezbûru ve arâzî-i merkūmu mahallinde kabza mezbûr Ali Bey’e taslît eyledim. Min ba‘d emlâk-i mezbûr Ali’nin mülk-i müşterâsı ve arâzî-i merkūme hakk-ı müfevvazıdır, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ vaka‘a bi’t-taleb [ketb] olundu. Fi’l-yevmi’s-sânî aşer min Cemâziyelevvel li sene isneteyn ve mi’e ve elf. Şuhûdü’l-hâl: İbrahim Çelebi b. Receb, Abdülkādir b. Süleyman, Mustafa b. Şaban, İbrahim Çelebi b. Sefer, Yahya b. Receb, Abdülbâki b. Mehmed, Abdullah Efendi b. Himmet, Ahmed b. Bekir ve gayruhüm.