Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 49 Hüküm no: 24 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cariye Sadakat’in Ayşe Hanım aleyhindeki hürriyet iddiasını ispatlaması Ma‘rûz, Rıkka inkıyâd-ı sâbıkını mukırra ve mu‘terife ber-vech-i âtî da‘vâya kıbel-i şer‘den mezûne olan Zenciyetü’l-asl ma‘lûmetü’l-vasf Sadakat bt. Abdullah mahfil-i şer‘iyyâtda İstanbul’da Aksaray kurbünde Kazganî Sadi Çelebi mahâllesinde sâkine bâ‘isetü’l-i‘lâm mu‘arrefetü’z-zât Âişe Hanım bt. Halil muvâcehesinde ben işbu târîh-i i‘lâmdan iki sene mukaddem gāibetü ani’l-meclis Maverdi Kadın’ın rıkka münkāde yedinde şirâen câriye-i memlûkesi iken gāibe-i merkūme Maverdi Kadın mahzar-ı şuhûdda beni malından âzâd ve i‘tâk ve sâir harâir-i asliyât zümresine ilhâk ve idrâc edip ol vechile ben hürretü’l-asl olmuş iken işbu mezbûre Âişe Hatun rakīka câriyesi olmak üzere bana fuzûlî ve bi-gayrı hakkın vaz‘-ı yed ve beni âhara bey‘ murâd eder olmağla suâl olunup sebîlim tahliye olunmak murâdımdır deyü ba‘de’d-da‘vâ ve’l-istintâk, ol dahi cevâbında müdde‘iye-i mevsûfe-i mezbûreye rakīka câriyesi olmak üzere vaz‘-ı yedini ikrâr u i‘tirâf edip lâkin gāibe-i merkūme Maverdi Kadın’ın müdde‘iye-i mezbûreyi gāib ani’l-meclis Esirci Mustafa Ağa b. Abdullah nâm kimesneden semen-i medfû‘ ve ma‘lûm ve makbûza bey‘ ve teslîm etdiğinde ol dahi ba‘de’l-iştirâ ve’t-temellük ve’t-tesellüm ve’l-kabûl üç bin iki yüz guruş semen-i medfû‘ ve makbûza bana bey‘ ve temlîk ve teslîm eylediğinde ben dahi ber-minvâl-i muharrer iştirâ ve temellük ve tesellüm ve kabûl etmemle ol vechile müdde‘î-i mevsûfe-i mezbûreye şirâen mülküm olmak üzere vaz‘-ı yed ederim deyüp müdde‘iye-i mezbûre Sadakat’in ber-minvâl-i muharrer ıtk müdde‘âsını inkâr etmekle müdde‘iye-i mevsûfe-i mezbûre Sadakat ber-vech-i muharrer ıtk müdde‘âsını her biri lede’t-tezkiye adl ve makbûlü’ş-şehâde [idükleri] ihbâr olunan mahâlle-i merkūme imamı Hüseyin Efendi b. Mehmed ve Yaver Ağa b. Abdullah nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘iye-i mezbûre Sadakat’in ıtkına ba‘de’l-hükm şer‘an sebîli tahliye olunduğu huzûr-ı [âlîlerine i‘lâm olundu]. Fî 5 B sene [12]73.