Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 50 Hüküm no: 25 Orijinal metin no: [4a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ali’nin kaimeye çevrilmek üzere Ali Ağa’ya vermiş olduğu Fransız altınlarının iade olunması İstanbul’da Sofular mahâllesinde sâkine bâ‘isetü’l-i‘lâm mu‘arrefetü’z-zât Emine Hatun bt. Ali mahfil-i şer‘iyyâtda Manav esnâfından sâhib-i arzuhâl Ali Ağa b. Süleyman nâm kimesne muvâcehesinde merkūm Ali Ağa benim bâ-temessük-i mütevellî bi’l-icâreteyn müstakilleten mutasarrıfe olduğum mahâlle-i merkūmede kâin ma‘lûmü’l-hudûd bir bâb manav dükkânında beher şehr yüzer guruş icâre tesmiyesiyle müsteciren sâkin iken ben malımdan beher adedi yüzer guruşa mu‘âdil yirmi aded Fransız altınımı mezbûr Ali Ağa yedine i‘tâ ve teslîm ve zikr olunan yirmi aded altını eyâdî-i nâsda nakid hükmünde mütedâvil yirmilik kavâime tebdîl ve bana teslîm etmek üzere emr ve tarafımdan tevkîl, ol dahi yedimden vech-i muharrer üzere tamâmen ahz ü kabz etmiş iken zikr olunan yirmi aded Fransız altınını kavâime tebdîl etmediğinden mâ‘adâ mezkûr altınları dahi bana redd ü teslîm etmeyip aynen yedinde kalmağla zikr olunan yirmi aded Fransız altınını mezbûr Ali Ağa’dan istirdâd ederim deyü ba‘de’d-da‘vâ ve’l-istintâk, ol dahi cevâbında benim müdde‘iye-i merkūme Emine Hatun zimmetinde cihet-i karzdan alacak hakkım olan altı bin üç yüz guruşun üç bin guruşunu müddet-i ma‘lûmede dükkân-ı mezkûrun terâküm eden icâre-i müsemmât-ı ma‘lûmesinden müdde‘iye-i mezbûreye zimmetimde deynim olan üç bin guruşa bi’t-terâzî takās ve mahsûb edip müdde‘iye-i mezbûre zimmetinde bâkī üç bin üç yüz guruş alacak hakkım kaldıkdan sonra müdde‘iye-i mezbûre Emine Hatun bana malından yüz guruşdan cem‘an iki bin guruşa mu‘âdil olan zikri mesbûk yirmi aded Fransız altınını i‘tâ ve teslîm ve mârrü’z-zikr yirmi aded altının beş adedini kavâime tebdîl ve kendüye vermek ve bâkīsi olan on beş adedini dahi ve ben meblağ-ı bâkī-i mezkûr üç bin üç yüz guruşun bin beş yüz guruşuna takās ve mahsûb etmek üzere bana emr ve beni tarafından tevkîl eylediğinde ben dahi yedinden vech-i muharrer üzere ba‘de’l-kabz ve’l-kabûl mârrü’z-zikr yirmi aded Fransız altınının beş adedini dahi kavâim-i mezkûreye bi’t-tebdîl müdde‘iye-i mezbûre yedine i‘tâ ve teslîm ve bâkīsi olan on beş aded altını dahi deyn-i meblağ-ı bâkī-i mezkûr olan üç bin üç yüz guruşun bin beş yüz guruşuna takās ve mahsûb etmemle bâkīsi olan bin sekiz yüz guruşu dahi ben müdde‘iye-i mezbûreden hâlâ taleb ederim deyü [4b] ba‘de’d-da‘vâ ve’d-def‘ merkūm Ali Ağa sâlifü’z-zikr altı bin üç yüz guruş ikrâz ve teslîmini zikr ü beyana ve mârrü’z-zikr beş aded altını kavâime bi’t-tebdîl müdde‘iye-i mezbûreye teslîmini sübûta ba‘de’l-havâle el-hâletü hâzihi mezbûr Ali Ağa’nın ikrâr u i‘tirâfıyla lâzım gelen ancak sâlifü’z-zikr on beş aded Fransız altınını müdde‘iye-i mezbûre Emine Hatun’a aynen redd ü teslîme merkūm Ali Ağa’ya tenbîh olunduğu huzûr-ı [âlîlerine i‘lâm olundu]. Fî 15 B sene [12]73.