Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 51 Hüküm no: 26 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İran tüccarından Feyzullah Ağa’ya olan borcunu ödemesi hususunda Mehmed Eşref Ağa’ya tenbih olunması Ma‘rûz, İran Devleti teba‘asından ve tüccârdan bâ‘isü’l-i‘lâm Feyzullah Ağa b. Mahmud devlet-i müşârün-ileyhâ sefîri tarafından mürsel kapuçukadârı Abdullah Ağa b. Abdi hâzır olduğu hâlde mahfil-i şer‘iyyâtda İstanbul’da Atpazarı’nda sâkin Mûytâb esnâfından Mehmed Eşref Ağa b. Ali nâm kimesne muvâcehesinde mezbûr Mehmed Eşref Ağa zimmetinde işbu târîh-i i‘lâmdan iki buçuk ay mukaddem malımdan ve yedimden iştirâ ve kabz eylediği Kızanlık çulu ta‘bîr olunur aded ve fiâtı beynimizde ma‘lûm çul semeninden gayrı-ez teslîmât sahhü’l-bâkī yüz doksan guruş alacak hakkım olmağla meblağ-ı mezkûr yüz doksan guruşu mezbûr Mehmed Eşref Ağa’dan hâlâ taleb ederim deyü tasaddî eylediğim da‘vâ-i mezkûremden mezbûr Mehmed Eşref Ağa ile an inkâr kat‘â li’n-nizâ‘ yüz guruş üzerine sulh olduğumda ol dahi sulh-ı mezbûru ba‘de’l-kabûl bedel-i sulh-ı mezkûr yüz guruşdan mâ‘adâ ziyâde müdde‘âma ve bi’l-cümle husûs-ı mezkûra müte‘allıka da‘vâdan ben mezbûr Mehmed Eşref Ağa’nın zimmetini, ol dahi kezâlik husûs-ı mezkûra müte‘allıka da‘vâdan benim zimmetimi tarafeynden her birimiz ibrâ-i sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yüz guruşu müdde‘î-i mezbûr Feyzullah Ağa’ya edâ ve teslîme mezbûr Mehmed Eşref Ağa’ya tenbîh olunduğu tescîl ve mübâşirleri Bâb-ı zabtiye neferâtından İbrahim Edhem Ağa kulları yediyle huzûr-ı [âlîlerine i‘lâm olundu]. Fî 15 B sene [12]73. Akif