Mahfel-i Şer‘iyyât Mahkemesi 3 Numaralı Sicil (H. 1273-1274 / M. 1857) cilt: 97, sayfa: 51 Hüküm no: 27 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gözleve muhacirlerinden Ömer Ağa’nın eşya bedelinden olan borcunu ödemesi hususunda Mardıros’a tenbih olunması Gözleve muhâcirlerinden olup İstanbul’da Mahmudpaşa civârında Fincancı Hanı’nda sâkin bâ‘isü’l-i‘lâm Ömer Ağa b. Sadullah nâm kimesne mahfil-i şer‘iyyâtda Devlet-i aliyye teba‘asından ve ekmekçi esnâfından Mardıros v. Papas Kirhor muvâcehesinde ben bundan akdem Gözleve’den hicret ve vilâyet-i Rumeli’de Balçık kasabasına muvâsalat birle kasaba-i merkūmede vâki‘ berber dükkânında merkūm Mardıros ile ma‘an sâkinler iken dükkân-ı mezkûrda mevcûd malım olan mecmû‘u bin dokuz yüz altmış dört guruş kıymetli üç adedi kuş tüyü memlû ve dört adedi yün memlû cem‘an yedi aded basma baş yasdığı ve bir aded nühâs leğen ve bir aded nühâs tencere ve bir aded nühâs tâbe ve iki aded nühâs sahan ma‘a kapak ve iki aded nühâs lenger ve dört aded nühâs kadayıf tepsisi ve bir aded nargile ma‘a pirinç ser ve bir adedi atlas ve bir adedi şâlî ve bir adedi Şam alacası ve bir adedi canfes cem‘an dört aded anteri ve bir adedi çuka setri ve bir adedi çuka ve bir adedi şâlî cem‘an iki aded sako ve bir aded fesimi merkūm Mardıros yedine li-ecli’l-hıfz îdâ‘ ve teslîm eylediğimde ol dahi yedimden ber-vech-i muharrer istîdâ‘ ve tesellüm ve kabz ve kabûl etmiş idi. El-hâletü hâzihi eşyâ-yı muharrere-i mezkûreyi merkūm Mardıros kâmilen istihlâk etmekle ba‘de’s-sübût kıymetleri olan meblağ-ı mecmû‘-ı mezkûr bin dokuz yüz altmış dört guruşu merkūm Mardıros’dan bi-tarîkı’d-damân hâlâ taleb ederim deyü ba‘de’d-da‘vâ ve’l-istintâk ve’l-inkâr müdde‘î-i merkūm Ömer Ağa ber-vech-i muharrer müdde‘âsını her biri mahâllerinden lede’t-tezkiye adl ve makbûlü’ş-şehâde idükleri ihbâr olunan dikici esnâfından Gözleveli Hasan Ağa b. Osman ve kebabcı esnâfından Abdülkadir Ağa b. Sadullah nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince meblağ-ı mecmû‘-ı merkūm bin dokuz yüz altmış dört guruşu müdde‘î-i merkūm ömer Ağa’ya bi-tarîkı’d-damân edâ ve teslîme merkūm Mardıros’a tenbîh olunduğu tescîl ve mübâşirleri Bâb-ı zabtiye neferâtından Manastırlı Abdullah Ağa kulları yediyle huzûr-ı [âlîlerine i‘lâm olundu]. Fî 26 Receb sene [1]273 İbrahim.